Election nung Prashant Kishor tetuyuba aginer: Tarun Gogoi

Guwahati, November 23 (Agencies): Nitish Kumar atema takok nguja inyaktsüba sülen, Assam chief minister Tarun Gogoi-i 2016 state assembly nung election strategist Prashant Kishor dang nungi kasa tetuyuba aginür, ta ashi.
“Pa ya Assam election mapanga lidaktsüner. Pai dang arura onoki kanga pelashishia agizüktsü,” ta Gogoi-i Hombarnü ashi.
Indian People’s Action Committee (IPAC) nung tekolaksang, Kishor ya Bihar election nung Kumar asoshi tenungiter tajung ka ama liasü. Iba den külemi pai Narendra Modi’er teloka 2014 küm Lok Sabha election nung takok ngudaktsü.
Kümsük agi matong dang state nung BJP tir melenba ya Bihar tamakok ajanga lir, ta chief minister Gogoi-i ashi.
State nung BJP tir Siddhartha Bhattacharya melena Union Minister of State-Independent Charge for Sports & Youth Affairs, Sarbananda Sonowal-i tawa shimogo.
BJP-i nung züngsem kari ashiba agi, Congress nungi Himanta Biswa Sarma BJP nung dendaktsübaji Siddhartha Bhattacharya asalendong ajanga lir.
BJP election committee nunga Sonowal-i lenitsü benloktsüogo aser ibaji ajanga pa state BJP nungi chief minister menden asoshi tokteptsü ta angateter.
“Bhattacharya ajanga Congress züngsemtem BJP nung aniok süra kechiba pa tir menden nungi aludaktsü ? Iba inyakyim yagi Bihar election nung BJP tamakok aluba ajanga tipmetemtetba sayur. Parnok temulung matem asübo tanga ama tensa tepettep ka nung party tir memelenla,” ta Gogoi-i ashi.
Iba den külemi Gogoi-i, “P B Acharya ya Angh ama masü saka Rashtriya Swayamsevak Sangh (RSS) atema bendanga agüja inyaker ka mesüka lir, anungji pa agiener Angh tanga ka melentsüla,” ta ashi.
Acharya-i, “Hindustan ya Hindu amangertem atema lir” ta shia mangatettep paidoktsü merang. Iba sülen pai, India ya Pakistan aser Bangladesh linüktem nung mezüngshi amshiba Hindu tamangertem atema lir, ta Deobarnü o melenshia jembi.
“Angh-i ashiba o agi nüburtem yirudaktsüogo aser ibaji atema mera tesashi kar agitsü. Joko mapang talang ka Angh ka danga Assam kija asoshi atakteta melemzüktsür. State atema Angh ka atakteta shimtsü nüngdak,” ta Gogoi-i ashi.