Election nung takok anguba atema Cong-i Rahul nem tenüngsang agutsü

New Delhi, Luchii/December 11 (Agencies): Yaküm December 11, 2017 nü Rahul Gandhi Congress Tir küma liasü, aser tanü kasa anogo nung pai sempet ana angur amai Congress-i Rajasthan aser Chhattisgarh states assembly election nung takok nguogo.
Opposition party tem, talisa BJP-i Rahul Gandhi kanga atalaja aruogo, ajisüaka tang tatemsa pa leniba nung tawa state pongu nung agiba assembly election nung state asem nung takok angur.
Iba takok atema UPA Chairperson, Sonia Gandhi nungi tenzüker Congress lenir aikati Rahul Gandhi nem tenüngsang agutsüogo.
Tanü osangbener den party office nung jembidang UPA Chairperson, Sonia Gandhi-i, pai kanga meranga inyakogo aser party junga aniogo, ta ashi.
Congress lenir aser MP, Shashi Tharoor-i, “Tenüng tajungji Rahul Gandhi-i agitsüla. Pai kanga meranga nübo yimogo aser kanga meranga inyakogo,” ta metetdaktsü.
Arishi küm 48, Rahul Gandhi-i tan election nung nüboyim sentong 82 tashi nung jembia liasü, aser item sentong nung pai Rafale deal, Nirav Modi ochimashi onük, mapa manguba tebilemtsü aser aluyimertem timtem onüktem nung ajemdaker Ato kilonser, Narendra Modi den BJP aija liasü.
Item nüboyim aika nung Rahul-i Modi aija, “Linük Chowkidar ya auer,” ta aija liasü.
2019 küm Lok Sabha election agitsü lia aser opposition teloktep ka tentettsü asalentong yangluba mapang ka nung Congress-i takok anguba ajanga lenmang sadema lapoker.
Taoba mapang Minister aser Congress lenir, Milind Deora-i, nisungtemi telemsa adokdaktsüba mesüra yimtenren nung tamangba yimsü benokba sendokogo, ta ashi.
Paisa, “Rahul Gandhi-i kanga meranga inyakogo,” ta ashi.
Yaküm Rahul Gandhi party Tir akumba sülen Congress-i Himachal Pradesh nung tamakok angu, Gujarat assembly election nung menden aika nung takok angu aser Karnataka nung tamakok nguaka Janata Dal (Secular) den lokteper sorkar akum.