Election nung telok balala asüba agi tsükchiteptsü menüngdaker

Kohima, May 13: Nagaland Chief Minister, Dr. Shürhozelie Liezietsu-i tanü Honibar nü par yimertem dang election nung telok balala yariba agi yimer aser nübortem rongnung tsükchitepa alitsü nüngdak madoker ta metetdaktsü.
“Asenok yimten telok balala nung nokdakba ajanga asenok tsüngda metsükchiteptsüla saka nübortem ajungtsü atema longjemer inyaktsüla,” ta paiisa metetdaktsü.
Tanü Honibar nü Kohima yimtak Kerunyi benjongmong sentong nung tongti tesemdanger o jembidang pai iba o ya metyetdaktsü. Iba benjongmong sentong ya Kohima Village Council-i KVC hall nung ayongzüka liasü.
” Asenok India kübok ali tashi election yabo yamai agipet agiyonga aotsü, anungji asenoki asenok o asenok na putepa aotsü asoshi angazüktsüla ta paisa metetdaktsü.
Dr.Shürhozelie chief minister kümer külen mezüng par yimtak nübortem den jembiba mapangji iba benjongmong sentong nung jembiba ya liasü.
Kasa senden nung jembidang, pa chief minister akümba ya Tsüngremer sentong liasü aser tesünep nung yimsü süa otettsüsa yaritepba asoshi nübortem dang pelaba Shürhozelie-isa metetdaktsü.
Kohima nungertem ya Kohima nung ali kiburtem asünungji Kohima ajungtsü asoshi Kohima nungertemi akok tashi government den yariteptsüla aser timtem magütsütsüla ta chief minister-isa par yimertem ayongzüka ashi.
Dr. Shürhozelie-sa Kohima nung Nagaland Medical College lapoktsü atema ali agütsürtem dang pelaba metetdaktsü aser ano shirnokisa magütsüi ali, parnoki tarutsü lanu putu asoshi bilema tenladaktsüner ta mepishia metetdaktsü.
Kerunyi benjong ya aluyimertem küm piyong alu inyaktsü asoshi renema amongba benjong ka lir.
Iba sentong nung KVC mendenbuba Dr. Neiphi Kire memden liasü. Kohima yimtak mepu pezü lir aser mepu pezüpronga nungi sobaliba ken atenba nung shilem agia liasü.
Iba benjongmong sentong nung state government nung alirtem rongnung Home Minister Y Patton, Imkong L. Imchen, Yitachu, Phukayi, Dr. Nicky Kire aser Vikho-o Yhoshü nungertem dena liasü.