Election nung tokteptsü atema tenüng magütsütsüla: NNPGs

Kohima, Aenjeti (January) 28 (TYO): Nagaland nung yimtenren party temi ‘Solution of Naga political issue before election’ agizükba sülen tanü Naga nationalist political groups (NNPGs) tenet-i, nisung shingaia election nung tokteptsü atema tenüng magütsütsü aser election maparen nung shilem magitsü atema tekümdangtsü metetdaktsüogo.
Tanü Dimapur nung Core Committee of Nagaland Tribal Hohos and Civil Organisations (CCNTHCO)-i ayongzükba külem senden nung adenba sülen NSCN(IM) aser Naga yimtenren telok trok- NSCN (U), NNC/FGN, NNC (Parent Body), NPGN/NNC (NA), NSCN (R) aser NNC/GDRN (NA) nungi Working Committee-i külem sangdong ka ajanga iba osang sangdong.
NSCN-IM aser NNPGs külem sangdong nung, “India sorkar aser Naga yimtenren teloktem tsüngda ken o tejembidak mapang, ken o jembir teloktemi Naga nunger atema tagizüktettsüsa yimtenren ken o latettsü asoshi inyaktsü,” ta shia lir.
Parnokisa, State nung National aser Regional naprongla nungi yimtenren party ajaki “Solution, Not Election” atema telangzüba tajung agutsüba asoshi pelar, ta metetdaktsü.
“Tang ama Naga nunger atema tetendangba mapang ka nung asen nüburtemi tashi itta nungitba atema ken o jembirtem (Naga yimtenren teloktem) kanga pelar. Onokisa tribal Hohos aser lokti tentettemi telongjem alitsü atema mapa tajung inyakba asoshi pelar,” ta sangdong nung shia lir.
“Naga nunger ajaki election nung shilem magitsü atema longjemer lemtetba mapang ka nung, shingaia pei ajangzüktsü atema election nung tokteptsü atema tenüng agüja aser election nung shilem agiba ajanga puti mapang nungi ken o jembia aruba nung teraksa bener marutsütsü tekümdangtsü metetdaktsür,” ta parnokisa metetdaktsüogo.
Ano külen CCNTHCO-ia ken o jembir telok ana- NSCN (IM) aser NNPGs Working Committee longjemer “Solution, Not Election” onük nung külem sangdong agütsüba asoshi pelaba lemsatepogo.
Core Committee convener, Theja Therie-i sangdong ka ajanga yimtenren pary ajak dang asüng (Aenjeti 29) anüngdang 11:00 ako nung Hotel Japfu, Kohima nung ayongzüka aliba külem senden nung adentsü nenshia mepishir, ta metetdaktsü.
Iba senden nung yimtenren party tem dak alia ken o jembir teloktem- NSCN (IM) aser NNPGs-i shilem agitsü, ta paisa metetdaktsü.
Iba senden nung yimtenren party ajak nungi Tir aser tongti tezülurtem, NSCN (IM) aser NNPGs naprongla nungi züngsem tenetnet, aser Tribal hohos aser lokti tentettem nungi Tir aser tongti tezülurtem adentsüla, ta paisa metetdaktsü.