Election ochishia aginür

Tang ya balaka Nagaland nung asenok asoshi ochi o tiyazü na bendangnüba mapang ka lir. Atangji, ibai tongpang tulu, takoksa maremtetra makoktsüba tongpang lir. Nisung o satan natibo tiyazü jembiba aser ochimashi inyakba nungang tajangzük tuluba lir ta bilemtsü. Tiyazü jembiba aser ochimashi mapa inyakba agianga melamelaa takar aser tulur akümer. Aji oda, tanü Nagaland nung election nung takok anguba ya ochimashi toktepba nung shibai ochimashi tematiba jenjang ngutetter ta asüba nung takok tokteper amai ka kümogo. Asenok ajak tia kanga majung tanübo ibajiang nisung tsüngdangbo shitak aser tajungba amai bilemer. Ibayongji, tanübo asen lima nung yimten telok balala nung lenirtemji pei pei telok angatetba aser nükjidong (party ideology) jembia senzür masü saka tiyazü lu ayimer amai tiyazü tiyazü dang jembia senzüba asenoki angutsü aser parnoki inyakba mapa ajakji ochimashi asütsü. Idakji asenok ajak dena lir. Aji oda, tiyazü aser ochimashiba mapa ya meinyaki takar akümtsü aser junga mezüngi tulur akümtsü merangba lenmang lir. Tanü asen lima nung election atema yangluba electoral roll-a melamelaa takok angutsü asoshi tiyazü yangluba mapa ka lir. Asenoki asen alidak nütsüng yongsük aika asünungdang government nungi teyari sen aika yoktsü aser electoral roll nunga nisung aika tenüng enoktettsü ta bilema enokbajibo tai masü amai bilemer. Joko, asenok tamangba jenjang ya tiyazü jembiba aser ochimashi mapa inyakbatema tai masü amai bilema sademsadema inyakba jenjang nung lir. Ibayongji, tai aser ochimashi mapa ajak asenoki sarasademer inyaker. Aji oda, tanü election tim mesüi agiba merüktettsü jembidang, asenoki taoba hopta nung iba osangkaket nung ‘Koma süla ?’ ta asüba nung shisalemsatepba ama, election maparen tim mesüi aliba merüktettsübaji electoral roll nung nisung temsüa alirtem dang züluoktsü aser metemsüba aser meshitakba purtem endoktsü ta asüba nungi tenzüktsüla. Atangji, asenokbo tiyazü kanga jembiba agi tiyazüji shitak ama kümadoker aser ochimashi mapa kangasa inyakba agi joko ochimashiba mapatemang ochi ama kümadoker asünungji, electoral roll nung nisung meshitak aser talila züluoka alibaji meindoknütsü saka endoktsüla. Asenoki meindoknütsüa akok saka tanübo meindok nung majungtsüsa technology inyakyim agi menepa arudagi. Aji oda, telangzüri ashiba ama, Biometric amshia vote agütsü nungbo electoral roll nung nisung aika enoka liaka meinoktettsü. Aji oda, asenoki ochishia melinüyonga alima inyakyim agi asenok ochishia alitsüsa kümogo. Ochimashiba mapa ya asenok kija tebilemtsü masü saka alima ajunga nung alirtemi ajuruba timtem aser takoksa lir, anungji alima nung yimten yimsüsür, tashitemetetter aser tesayurtem ajaki ochimashi mapa nokdangtettsüsa inyaktettsü lenmang bushir. Tangbo, asenoki jakdaka yimjak nung government nungi senotsü angutsü mechi nung aser electoral roll nung voter aika alitsü mechi nung tiyazü aser ochimashi mapatem inyaktetteter. Ajisüaka, ochimashi mapatema meinyaktettsüsa mapang ka arudagi. Shitakba agibo, asenok Khristan purtemibo nütsüng ishika asüba agi senotsü ishika dang aruyonga aser voter ishika dang asüba agi onok candidate madokyonga ochishia lira Tsüngremi moatsütsü ta amanga yimten aser lokti nung ochishia shilem agitsüla. Alima rongsen aser yimten yimsüsüba menden samayonga tanüla jenjang mesamara, ibajiang tongtibangba ta asenok Khrista-temi angatettsüla. Ni election nung madokyonga mesüra onoki yariba candidate madokyonga kü temetenbo mayoktsü, kü jaklabo mayoktsü, nibo ochishia alitsü aser takoksa-ang aremtsü ta senso shiai peisasa nangzüktettsüla. Takoksa tilakata mangu aser tamakok tikata marem ochishia alitsübaji tasak dang masü saka tamakoktsü, anungji asen tajangzük atema ochimashi mapa inyaktsü melen takoksa aser tamakok arema ochishia inyaktsü tim. Tapu tapua atalokang, tesüsabo Ochi agidang akoktsü aser Ochii yimsü asütsü. Ochishia alibasa tajungba aser temoatsüba !