Election office-i shinga tsütsü tejak mashir: Acting CEO

Kohima, June 28 (TYO): Nagaland state election office-i political party aser candidate ajak den kasa tepila ayur ta acting Chief Electoral Officer (CEO) Nagaland, N Moa Aier-i tanü ashi.
Nagaland Pradesh Congress Committee (NPCC)-i Nagaland Governor nem memorandum ka agütsüba atema Moa Aier-i osangbener dang “election office-i election ajak nung political party aser candidate shinga tsütsü tejak shir meinyaker” ta ashi.
June 26 nü NPCC working president Khriedi Theünuo-i Governor nem memorandum ka agütsüba nung CEO Nagaland indang office-i tanga political party candidate tem nem polling agents form talila agütsü saka Congress candidate nembo form ajema agütsü ta shia lir.
Congress candidate K L Chishi nem form 4901, Hayithung Tungoe (NPP) nem 4020, Tokheho Yepthomi (NDPP) nem 10,306 aser Dr MM Thromwa Konyak (Independent) nem 400 agütsü ta Moa-isa ashi.
Candidate temi meshiba ama form temji agütsü. Candidate mesüra parnok election agent temi form meshitsü atema formal application agütsütsü menüngdaker, tebang agidang meshia nunga CEO office mesüra District Election Officer aser Assistant Returning Officer ajanga form agütsür, ta Acting CEO-isa metetdaktsü.
NDPP polling agent-isa CEO office dangi formal application ka zülu aser tanüngba party temi receipt ka nung sign asüba sülen tebang agi meshiba ama dang forms agütsü, ta paisa ashi.
Anungji, candidate mesüra election agent nem form agütsüba nung election department-i tim mesüi inyakba mesüra tejak repranga inyakba kecha mali, ta Moa Aier-isa shisem.