Election sülen ang budget benoktsü opposition-i akhanger

New Delhi, January 05, 2017: Brihostibarnü New Delhi nung opposition party tem- Congress, Trinamool Congress, Janata Dal (United), Samajwadi Party, BSP, DMK aser JD(U) lenirtemi Chief Election Commissioner ajuruba sülen Election office nungi meyipa aoba noksa nung angur. 

New Delhi, January 05 (Agencies): Tanü Brihostibarnü opposition party aikati Election Commission (EC) ajurua state pongu nung assembly elections agiba sülenang Union budget benoktsü mepishiogo.
Parnoki Union Budget ji March 8, 2017 sülenang akatsü mepishia liasü.
February 1 nü Union Budget senden akatsü sentong renema lir, aser state pongu nung assembly elections ji February 4 nungi March 8 nü tashi anogo balala nung agitsü Election Commission-i sangdongogo.
Congress, Trinamool Congress, Janata Dal-United, Samajwadi Party, Bahujan Samaj Party, Rashtriya Janata Dal aser DMK ama opposition party tem nungi teshimtet telok kati Chief Election Commissioner, Nasim Zaidi ajurua Union Budget ji March 8 nü sülenang benoktsü mepishi.
Parnoki EC ajuruba sülen osangbenertem den jembidang Congress lenir, Ghulam Nabi Azad-i, “Election jakdang budget benoktsü melaba ajanga sorkari (BJP) tim mesüi tajangzük angutsü aser ibaji ajanga vote agutsütsüpurtem melung melenshidaktsütsü ta onoki shiogo,” ta metetdaktsü.
Opposition-i ashibaji EC-i tenoktenoka anga, ta paisa ashi.
Uttar Pradesh, Uttarakhand, Punjab, Goa aser Manipur state tem nung election agitsü lia February nü budget benoktsü sentong lir.
Ano Trinamool Congress nungi Lok Sabha züngsem, Derek O’Brien-ia, parnoki benokba atema EC-i inyaktsü imlar, ta ashi.
Paisa, “March 8 sülen budget benoktsü atema mapang peria lir. Ibaji dang tim inyakyim asütsü,” ta ashi.
Ajisüaka iba atemaji Bharatiya Janata Party (BJP)-ibo opposition aitsüogo.
Union Minister Mukhtar Abbas Naqvi-i, “Budget ji linük temzüng teinyaktsü ka lir aser ibaji state kecha den-a sentaktepa mali. Budget benoktsü atema inyakbaji ajungbena agiba telemtetba ka masü,” ta ashi.
Maneni BJP National Secretary, Siddharth Nath Singh-ia, budget anema nokdakbaji ajanga Congress aser Samajwadi Party kodamasüba sayur, ta aitsü.
“Budget ji temzüng teinyaktsü ka lir aser elections den tesentaktep mali. Mapang shia asenok election agir. Iba atemaji budget atsülangtsü menüngdak,” ta paisa ashi.
Tamalena opposition-i Tir, Pranab Mukherjee aser EC dang shidi ajanga Union Budget atsülangtsü mepishia liasü.