Election sülen party tem lokteptsü: Ashok Gehlot

New Delhi, March 20 (Agencies): Lok Sabha election jakdang state aika nung Congress-i tanga party tem den melokteptetba mapang ka nung tanü Congress lenir aser Rajasthan Chief Minister, Ashok Gehlot-i, election jakdang party tem melokteptetaka election tembangba sülenbo BJP anemba party tem lokteptsü, ta metetdaktsü.
“Congress-i state aika nung tanga party den loktepner aser party Tir, Rahul Gandhi-ia Lok Sahba election nung party-i tangar den lokteper tokteptsü ta shiogo,” ta Gehlot-i ashi.
“BJP pur senotsü aika lir aser parnoki sen tashi tim mesüi amshia takok nguner,” ta pai ashi.
Osangbener den jembidang Congress lenirisa, “National party ka ama Congress teinyaktsü mapa lir. Congress-i teloktep junga meyanglutetra aser party nung inyakertemi teloktep party nung inyakertem den meputettetra loktepbaji amajok,” ta ashi.
Uttar Pradesh nung SP-BSP-RLD teloktep dak sendakba nung Gehlot-i, Samajwadi Party aser Bahujan Samaj Party nata parnok teinyaktsü lir, ta ashi.
“Parnok tebilemba balaka aliba ajanga parnoki (SP aser BSP) Congress den meloktep. Ajisüaka election matongdang mesüra election tembanger teloktep alitsü. Nüburtemi ibaji akhangtsü,” ta arishi küm 67 lenir, Gehlot-isa ashi.
Lok Sabha menden 80 aliba state, Uttar Pradesh nung SP aser BSP na loktepogo.
Uttar Pradesh nung Congress-i menden 30 atemabo candidates tenüng sangdongogo. Parnoki Bihar aser West Bengal na nunga teloktep meyangluteter.
“Kechi atalokdir atalokaka Modi sorkar marutsü. Election jakdang party tem melokteptetaka election agiba sülenbo party tem (BJP anemba party tem) lokteptsü,” ta pai ashi.
Gehlot-i, linük nung democracy lendong nung lir, aser sorkar anema jembir ajakji linük anemertem, ta aitsür, ta shisem.