Election tama agitsü, iba sülen yimtenren latettsü: Madhav; Election nung tokteptsüpur candidate 15 BJP nung aden

Dimapur, Aenjeti (January) 22 (TYO): Naga nunger lokti tentet aikati India-Naga yimjung ken o metembang tashibo election magitsüla, ta akhangba mapang ka nung tanü BJP National general secretary aser Nagaland o Tripura na election in-charge, Ram Madhav-i, election tama agitsü iba sülen yimtenren onük atema inyaktsü, kechiyong ibaji ajanga dang yimtenren onük latettsüsa bener arutsütsü, ta metetdaktsü.
“Linük temzüng kübok onoki mepaidoktettsü teinyaktsü kar lir, anungji tang election agitsüsa akumer,” ta paisa metetdaktsü.
Tanü Hotel Saramati, Dimapur nung BJP nung adener tasenpurtem tushia agizükba sentong nung jembidang Ram-i, “India sorkar aser NSCN-IM na tsüngda yimjung ken o nung kanga terenlok kaogo. Naga Agreement tatemsa latetba nung yaritsüsa onoki sorkar ka nüngdaker,” ta metetdaktsü.
“Naga yimtenren telok balala den tezüngzüktep tajung ka bener arutettsü atema Narendra Modi-i aniba sorkari state nung tesünep atema inyaker,” ta pai ashi.
Paisa tanga teloktem danga yimjung ken o jembiba maparen nung adentsü mepishiba den külemi, BJP sorkari yimtenren onük tatembangsüa latettsü atema inyaker, ta metetdaktsü.
“Nagaland nung BJP-i kishi lapokja dang lir, iba den külemi sorkar tashi tait ka aser terenlok bener arutsüba sorkar ka yangertettsü atema yimtenren party lenirtem ajak dang BJP nung adentsü mepishir,” ta Madhav-i ashi.
Iba sentong nung state BJP Tir, Visasolie Lhoungu-i züngsem tasenpurtem party nung pelaa agizüka, “Iba ya ajanga state nung mopungsem ka adokdaktsüogo, aser tarutsü anogotem nunga party nung aika adentsü imlar,” ta metetdaktsü.
Taoba mapang chief minister aser Congress Party lenir tain, KL Chishi-i, “Nagaland nung timtem aika adoka lir, aser item rongnung tongtibangtibaji India-Naga yimtenren onük ya lir,” ta metetdaktsü.
Paisa, “Sorkar balalai nübur taginüba mataloktsütet. Congress-i India-Naga yimtenren ken o junga metembangdaktsüner. Naga nungeri mapang talangka ataogo, ajisüaka (Congress) yimsüsüba mapang nung kecha mesütet,” ta metetdaktsü.
Paisa, BJP yimsüsüba mapang nung parnoki Naga yimtenren onük kanga süoki ia agir, aser tanübo Ato kilonser, Narendra Modi-i Naga nunger aser India sorkar tsüngda yimtenren ken o jembiba nung terenlok akatsü atema telemtetba agiogo, ta metetdaktsü.
“Naga nunger taginüba kera ataloktsü imlar. BJP-i yimteren latettsü atema inyaker, aser Naga nungeria BJP dak tamang aka atenzükogo,” ta paisa shisem.
Tanü iba sentong nung election nung tokteptsü atema tebilemba alir candidate 15 BJP nung denogo, aser parnok rongnung taoba chief minister aser Congress lenir tain, KL Chishi (32 A/C Atoizu) densema lir.
Tangartemji Ex-MLA, Jacob Zhimomi (Ghaspani -I), V Khashiho Sangtam (59 A/C Kiphire), Khehovi (Suruhoto A/C), Kazheto (Akuluto A/C), R Tsapikiu Sangtam ex -Congress candidate (60 Pungro A/C), H Haiying Khiamnungan, ex-Congress candidate (56 A/C Noklak), Dr. Benjung Lam (56 A/C Noklak) taoba NEZCC Director, Lipokmar Tzudir (Tuli A/C), Kasheto Yepthomi (Ghaspani -I A/C), Hukiye Tissica ex- Congress candidate (Aghunato 34 A/C), Atoka Tuccu (Dimapur-I A/C), Tokuho Neho (Ghaspani -II A/C), Imjongwati (29 Jangpetkong A/C) aser Hewoto Awomi (Dimapur -II A/C) nunger lir.