Election tang agira BJP-i menden peria mangutsü

New Delhi, Luroi (August) 20 (Agencies): 2014 küm Lok Sabha elections nung Bharatiya Janata Paty (BJP)-i takok tulu angu saka tang elections agi nungbo parnoki taoba mapang ama takok mangutsü ta India Today-Karvy Insights ajanga ashir.
Mood of the Nation (MOTN) Survey ajanga NDA-i Lok Sabha nung menden 281 nung dang takok angutsü aser Congress den parnok teyaritepertemi menden 122 dang angutsü.
Iba survey ya July 18 nungi July 29 tashi agi aser parnoki bushitetba agi “2019 general elections nung tanga teloktemi tongtipang shilem agitsü aser parnoki menden 140 shi takok angutsü.”
Mood of the Nation (MOTN) Survey ajangasa NDA-i noklang nung shilem 36 votes angutsü aser UPA-i 5% tajemba ngua shilem 31 angutsü ta ashir. Iba telemsa nunga tanga teloktemi 33% votes ngua UPA den teimba angutsü ta ashir.
Survey ajangasa nisungtemi taruba prime minister ji Narendra Modi-sa aginür ta bushitet. Modi indang popularity ji 49% aser pa sülen Congress tir Rahul Gandhi 27% nung lir. Ajisüaka, vote agütsür shilem 3-i Priyanka Gandhi nem Prime Minister inyakdaktsünür ta bushitet.
Mood of the Nation survey nung chief minister tajungtiba asem rongnung BJP lennir ka danga maden. Chief minister tajungtibaji TMC tanishir Mamata Banerjee lir aser la sülen Bihar CM Nitish Kumar aser Delhi CM Arvind Kejriwal na atongtepa lir.