Election Temenen

–  R. Temjen Imsong, Ex Pastor,
Naga United Village, Dimapur.

Nagaland nung küm pungo shia Election ajanga asen lima yanglur masü teraksa tamajungba dang akümer, nebur rongnung sobaliba nung mangatettep aser meputep dang tali adokdaktsür, yimjung aser terenlok indangbo jembir saka tamajungba ajunga asen neburtemi inyaker, tebang agibo yimjung indang jembir saka temulungjangbo ochi mashi teraksa agi dang sünga lir. Kuli kar asenoki bushidi.
1. Election ya asen nüburtem sen bushiba lenmang ka dang kümogo. Ochishir aser nebur meimer masü, shibai sen teimba agütsür pa dang meimer, aji agi asen lima ya raksar.
2. Ka anema report agütsür, kati ashioktsür, tenükmerem ajanga tsükjitep adokdaktsür.
3. Takok toktepdang azü tokshiba, yim o yim na, kin o kin na, tsüngda mangatettep adokdaktsür, aser yimjung raksar.
4. Election ajanga shimba Public leader rongnunga telongjem mali, menden temaba aginüdang asen lima nung teinyaktsü mapatem kecha meinyaker senzüka doktsür.
5. Election nung tachitsü aser tajemtsü talubusa agütsüba ajanga lanur tajung aika den kijunga tena, Tsüngrem taochi nungi piladaktsür aser temang aser Tanela anaprongla menendaktsür.
6. Election ajanga tamangertem Tanela temeshi sempet samadaktsür, aser temeshi Arogo menendaktsür, aser Tsüngrem taochi nungi pilaa oa taaktsü maketba temenen mapatem inyakteper.
7. Election ajanga tamanger o tamanger na tsüngda mulung melemtep adokdaktsür, aji agi kati ka dak mapa ajak nung tamang makar.
8. Govt. mapa nung inyakertema aika pei ajungtsü indang bilemer, pei nebur meima inyakba agi anünga lir.
9. Khristar Arogo nunga telungjem samadaktsür, kechiyong tenzükertem rongnung kati ka dak temulung malemer aser tamang makar aji agi Arogo ya Laishibai mulungba Arogo masü nisungi mulungba Arogo kümdaktsür.
10. Political Party telok telok kümer Election aliba ajanga yimtsüng nung putu menden loksadaktsür. Arogo nung telemsa adokdaktsür, Asentenshi ajanga tadok meshiaka pei menaba temenentem menangzüktettsüsa aika lir.
11. Ajaklen Election atema Sarasademer, yimjung atema jembir. Saka temulungjangbo alima tatsüba len tuluba, rongsen arishia kinunger aser yimer tsütsülen temulung agütsür sarasadem nung aser yimjung indang jembi nung Tsüngremi langzüdi ma ?
Laishibai ashi, Temeshibai kin ka jungkettsür, saka kechi kin südir süaka temenenji taaktsü ka lir. A.shin 14:34.
Yisu Khristai alima nung pa dak amangertem nem ozüng ana agütsü, Mt. 22:37-39
1. Ne taküm ajak agi, ne tanela ajak agi, aser ne mulungsentsü ajak agi nai kibuba ne Tsüngrem meimang.
2. Nai ne kiyonger pei ama meimang.
Election ajanga teraksar masü, teyanglur, yimjung tesünep bener arur rongnung na atentsü ayongzüker.

————————————————————————————————————————–

– Aienla Ao <aienlaao525@gmail.com>

Tir Yimyim Oct 11, 2017, Aortem ken kaket tasenba agi mangmangtepdagi, ta I. Meren. Lemtur, Tzudikongi züluba nung sema nia tebilemba kar lemsateper. Asen jakdang tsüraburtemi parnok shisatsü agi adongba yari Kechi ojang inoka Ken kaket adokogo. Ashi ama. iba Ken tena kotaki ogo. Saka dang kechiba yanglua akaba meyipsaa nübur mangmangdaktsütsü. Anungji yasürbo Ken kaket meyipsatsü Kari danga bilema lira ojang süang ta shisemer. Aser Laishiba ya English nungi meyipzüker ta asüba ya ojang meyipang terajemba züngnüra English nung zünger rajemang nie….. Ken kaket o Laishiba melenshipet melenshiaka asen molungjang memelenshira amajok…ar temolungjang dang tasen yanglushitsü.
Tsüngrem dang taochi meshidi ta lemsateper.