Election ya democracy benjong ka lir : DC Bhanudas Mali IAS

Dimapur, Tsüklai/February 17 (TYO): Clean election dak sendakba nung Systematic Voters Education and Electoral Participation (SVEEP) indang seminar ka February 16, 2023 nü Multipurpose Cultural Hall, Zunheboto nung ayongzüka agia liasü.

Miss Sumi 2022 indang 1st Runner-up, Linovi Kiba, shiba SVEEP icon Zunheboto lir, lai nüburtem dang tarutsü anogotem jungdaktsütsü asoshi lenir shidak shimtsü tashi lir, ta ashi.

“Nüburtem aintsü asoshi election nung shilem agitsü kanga tongtipang lir aser asenoki yangji tajungtiba nung shilem agira, asen lokti nung asendenshi arutsü aser tarutsü jenjang yanglutettsü,” ta lai ashi.

Constitution ajanga tongtipangtiba tashi nüburtem nem agüja lir aser ibaji vote agütsütsü temeden ya lir. Universal Adult Franchise kübok arishi küm 18 aser tema senso ajaki vote agütsütsü temenden agüja lir, anungji ajaki clean election maparen inyaktsü ajungshir, ta lai ashi.

Iba sentong nung Deputy Commissioner aser DEO Zunheboto, Bhanudas Mali, IAS ajanga ashiba agi, election ya democracy benjong ka lir aser nüburtemi iba election ya yimjung nung benjongtsüla.

Lokti tentet balala aser yimtsüng temi election temürek aser timi agitsü nangzükba atema pelar aser ano administration aser Election Commission of India nem teyari agütsüba asoshia pelar, ta pai ashi.

Election agiba anogo jurila gari tem administration nungi temelaba makai tesem ka nungi tesem kati oli-oratsü memelatsü. Proxy voting, double voting aser election inyakyim nung timtem agütsüba nungi kumzüka ayutsü mechi iba mera ya agitsü, ta pai nüburtem dang tekumdangtsü ashi.

Tanü tashi election dak sendakba nung rongrong-shirong mesüra azüdokshi maliba atema pai Zunheboto nung aliba nüburtem dang pelaba lemsatepa liasü.

Iba sentong nung Bisalee, Assistant Election Officer ajanga melepzüng o jembi aser iba sülen Rev. Inakhu Sumi-i sarasadem aser AEO Zunheboto ajanga EVM amshiba yimya sayua liasü.

Iba sentong nung menden Yentinoungbou, EAC V.K liasü aser sentong tenzüka Aboli Aye, Asso. Pastor SBCZ ajanga sarasadem.