Electoral Literacy Club atema training agir

Kohima, Rongjui/September 06 (TYO): Chief Electoral Officer (CEO) Nagaland-i ayongzüka Rongjui 6-7, 2018 nung District Level Master Trainers (DLMT) atema anogo ananü Electoral Literacy Club training tenzükogo aser iba sentong nung district ajak nungi DLMT 16 shilem agia dendar, ta ketdangsertem osang ka ajanga metetdaktsü.
Okila jembidang CEO Nagaland, Abhijit Sinha-i training agirtem dang lanurtem, talisa vote agütsütsü atema electoral roll nung ano tenüng züngsema malirtem nem electoral awareness agutsütsü nüngdak, ibaji ajanga vote agutsütsü temsüa akumdang parnoki tim agi vote agutsütsü, ta ashi.
Paisa, school/colleges nung Electoral Literacy Clubs tenzüktsüla aser lanurtem nem electoral awareness agutsütsüla, ta ashi.
Iba training nung shisalen sayurtemji Keneilesa, Associate Professor & SLMT (State Level Master Trainer), Woshamo, Research Associate & SLMT aser SVEEP, ECI (ECI) nungi visiting officer, Mannu Yadav nunger lir.