Electoral roll atema teinyaktsü jenti lir: Nagaland CEO

Mokokchung, June 15 (TYO):  National Electoral Roll Purification maparen dak sentakba nung Bodhbarnü Mokokchung jila nung state Chief Electoral Officer, Nagaland, Sanjay Kumar-i Mokokchung district nung HODs, AEROs, Supervisory officers, BLOs, lokti tentet balala nungi lenirtem, Ward aser yim council züngsemtem aser kaketshir lenirtem den o lemtep kaogo.
Mokokchung Town Hall nung iba senden nung jembidang Sanjay Kumar-i, linük tesem ajungalen NERP exercise agiba ya electoral roll temerük atema lir, koba ajanga linük nung election temerük katettsü, ta ashi.
Mokokchung district nung tang tagitak NERP exercise dak sentakba nung CEO-i, “District nung tajung ka inyaktetogo, ajisüaka linük nükjidong ataloktsü atema ano teinyaktsü jenti lir,” ta ashi.
Paisa, electoral roll nung tenüng malitsüpurtem tenüngbo intoktsüla aser temsüa alirtem tenüng züloktsüla, ta ashi.
Pai AEROs, BLOs aser Supervisory Officer tem dang, E-roll nung anaben dak tali tenüng malitsü atema inyaktsüla, ta ashi. Paisa Electoral Photo Identity Card (EPIC) card ji Aadhaar card den sentakteptsü nüngdak, ta metetdaktsü.
Ward aser yimtsüng council züngsemtemi tongtibang shilem ka agitsüla ta tayongzükba agüja Sanjay Kumar-i, parnok teyari medenibo iba maparen tajungba makumtsü, ta ashi.
Office balala nung tekolakpurtem aser BLOs den technical senden amendang pai, e-roll nung taila voter tem intoktsü atema nendaka inyakdaktsüner, ta ashiba den külemi polling station ajak nung nüngdakba osettem agütsütsü nüngdak, ta ashi.
Ano CEO meina arurtem Joint Chief Electoral Officer, Moa aser tanga ketdangsertemia shilem agirtem dang state nung election temerük agitsüji ajak teinyaktsü khuret lir anungji meranga inyakdaktsüner, ta mepishi.
Parnokisa, E-roll merüktetba ajanga terenlok atema senotsü lemzüktsüba nung mekongshitsü , ta metetdaktsü.
Iba senden lenisang, D.C aser DEO Mokokchung, Sushil Kumar Patel-i CEO aser pa meina arur ketdangsertem nem tang district nung tagitak report agütsü.