Electoral roll merüktettsüla

Nagaland state ya ochimashi, tiyazü aser tamajung aika agi kanga mejungi menena lir aser itemji merüktettsü atema tetenzükdakji electoral roll ya asütsü. Iba tangatetba nung tang ya Election Commission of India-i linük ajunga nung electoral roll meshitaki alibatem metongshia merüktettsü asoshi ” National Electoral Roll Purification” sentong ka tenzüka inyakba den külemi Nagaland nunga tenzükogo. Iba sentong nung ya Nagaland Chief Electoral Officer-i tawa arogo aser lokti lenirtem jadena shisalemsatepba senden nung akok tashi arogoi iba maparen nung tongti shilem agidaktsünüa metetdaktsüba jagi  arogotem khuret ka bendenlokogo. Atangji, CEO-i mashidangyongi Nagaland nung Nagaland Baptist Church Council ajanga election ochishia shitak agitsü asoshi nübortem nem tangatetba agütsü tenzüker liasü. Aji oda, Nagaland nung Baptist arogotem asoshibo iba mapa ya teinyakdak mapa ka lir. Khen ashitsübo, electoral roll shitak yanglutsübaji arogo mapa masü ta shinütsüka, ajisüaka kechiba arogoing electoral roll shitak küma yanglushiba nung shilem aginür ta süra, ibai ochi o yazü na raraba tongpang ka lir. Iba tongpang nung arogo nungertemi makokba agi tanü Nagaland nung, nisungi masü, temeneni yimsü asür. Aji oda, Nagaland jungdi asüyonga iba temenen yimsüsüba maparentem ya manendaktsütet tashi majungtsü, anungji arogo nungertemi taküm tenla agüja iba ochi tongpang nung nokdaktsübaji kanga tenüngdaktsü kümogo. Arogo nungertem asoshi taküm tenlaji electoral roll nung tiyazü tenüng enokba ajanga anguba tajangzüktem magi arembaji asütsü . Iba tenla jagi pei yimtak aser pei alidak electoral shitak yanglutettsü. Tangbo, Naga nungertem aika electoral roll nung pei tenüng anaben-asemben züluoka lir aser ano kar nungbo tasürtem aser alima nung kodanga melidangba tenüng dena züluoka lir. Atangji, democratic lima nung election ajanga nisung teimbai mulungba lenir aser yimsüsür shimer asünungji electoral roll nung voter aika sünübaji nisunger yimya dang lir, kechiyong ajaki kokner. Ajisüaka, tiyazü aser tashiyim agi koker yimsü asüba nung jangratemtsü mali aser azükaru masür. Iba mapangji tang asenoki ajurur. Iba ama tia tamajungba nungi asenoki asenoksasa anitettsü asoshi tamasa electoral roll merüktettsü aser iba electoral roll nung ajemdaker election timi ochishia agitettsübaji arogo nunger temulungtetba asütsüla. Atangji, tiyazü electoral roll nung ajemdaker sen aser yi amshia tashiyim agi election agiba ajanga arogoi nokdangtsü meranger dang ashi, electoral merüktettsü asoshi mapa ajunga arogo nem nungloka toktsür Election  department mapa maka kazütsübaji masü mesüra yimten aser lokti lenirtembo repranga dang alitsü ta masü saka pei lima menentsüba aser tarutsü anogotem raksatsüba mapatem anemabo yimten, lokti, lanur aser kaketshirtem ajaki tongti shilem agia inyaktsüla. Tanü Electoral roll merüktettsü inyakba mapa ya pei lima yanglushiba mapa tongtibang ka lir ta ajaki angateta shilem agitsü junger. Atangji, sorkari electoral roll nung tenüng züluokertem shimteta lir, anungji parnoki ochishia shitak inyaktsüla. Ajisüaka, tesem aika nung tenüng züluokertem jagi nütsüng yongsük dang nungibo voter-ang teimba asütsüsa züluokba otsü lir. Ano, tesem aika nung town nung alirtema pei pei yimtsüng electoral roll nung tenüng enoka lir aser yimtsüng nung alirtema town electoral roll nung tenüng enoka lir. Ibayongji, Nagaland nung nütsüng den mesütep electoral roll nung voter tenüng züiner. Iba amaji meshitak inyakba putetaka tanü tashi nung tenüng meshitaki züluoker ka danga merenshiba mangashi. Ashiko, iba jagi teinyakertemi ochimashi mapa inyaktsü marendaki temulung ulua inyaker südi. Akhidang, Nagaland nung electoral shitak yanglutsü atema voter’s photo identity agütsütsüla ta kaketshirtemi kanga liasü saka tanübo iba jagia mapa meinyaker. Joko, memenui electoral roll nung tenüng enoktsü atema adhaar card amshi nung dang shitak asütsü. Iba inyakyim nung electoral roll yanglushitsübajiang arogo aser lokti lenirtemi akangtsüla. Atangji, electoral shitak yanglushibaji Nagaland yanglushitsü tetenzüker dang asütsü. Idakji ajemdaker election nung tashiyim, sen aser injang amshiba anema nokdaktsübajiang tongtibangba asütsü.