Electricity bill memonokba ajanga Maracana Stadium nung tesangwa mali

Rio De Janeiro, January 26 (Agencies): Brazil nung 2014 World Cup final asayaba, 2016 Olympics lapokba aser shibangba sentong agiba, Maracana Stadium indang light bill memonoktetba ajanga iba stadium nung Brihostibarnü nungi tesangwa magütsür.
“Maracana nung tesangwa agütsüba anentsüogo. Iba stadium nung electricity bill taoba küm, October ita nungi memonoki lir,” ta iba stadium nung tesangwa agütsüba company ka ajanga metetdaktsü. Iba electricity bill ajak agi, Brazil nunger sen (reais) million asem shi lir (USD $939,937), aser iba sen ya tang iba stadium kibur (Odebrecht company)-i million 1.3 aser Rio 2016 organiser-i million 1.7 agütsütsü lir.
Olympics organising committee ajanga iba stadium ya taoba küm September aser October ita amshia liasü, aser iba committee ajanga tang iba stadium nung tesangwa agütsüba company den iba sen-otsü asoshi jembiba mapang ka lir, ta osang ajanga ashi.
Iba stadium ya alima nung kanga nüngtugu ka lir. Iba stadium nung 2014 World Cup final, Germany aser Argentina tsüngda asaya aser Germany-i akok. Iba ama, 1950 World Cup final, Uruguay aser Brazil tsüngda iba stadium nung asaya liasü aser iba asaya nung Uruguay-i 2-1 agi Brazil akok.