Electronic osettsüset taila ayokertem mita alitsüla: MCCI

Mokokchung jila nung senso tajung kari shishilembatsü temelaba kulikaket makai electronic osettsüset taila ayokertem apuba sülen parnok den electronic osettsüset tangokba noksa nung angur. (Mokokchung, Aami/June 08, 2018).

Mokokchung, Aami/June 08 (TYO): Mokokchung Chamber of Commerce & Industry (MCCI)-i maneni nüburtem dang shishilembatsü atema kulikaket makai yokyayokjirtem dang nungi taila electronic osettsüset malitsü atema tekümdangtsü osang ka metetdaktsüogo.
Tanü jila nung aliba senso tajung kari item ama taila osettsüset ayoker nisung pezü pua MCCI dangi anir aru; parnokji Scorpio gari (registration number WB 16Q 9700) nung aru aser parnok ket nung shishilembatsü atema temelaba makai taila SONY HD LED Series 3200A television sets aser SONY home theater surround sound speakers ayokertem liasü, ta tanü MCCI Tir, Tsukti Longkumer aser tongti tezülur, Limalenden Longkumer nati sangdong ka nung metetdaktsü.
Iba dak alia Tuensang, Kiphire aser Mokokchung district tem semdangtsü atema parnok nem DC’s Office, Dimapur nungi ILPs agütsür liasü, ta kasa sangdong nung shia lir.
“Uttar Pradesh kübok Meerut nungi tsümartemji tilateri shishilembartem masü saka linük tesem ajungalen electronic osettsüset taila ayoker tetsütitem asütsü südi ta onoki bilemer. Iba dak alia kobi melii Mokokchung nung FIFA World Cup kana sapua reprangtettsü aliba ajanga parnok Mokokchung-i aru südi,” ta MCCI-isa metetdaktsü.
“District adener dang masü saka state adener-a tangalen nungi osettsüset taila ayokertem district-i aruba ya tang mezüng masü, saka tamalena Mokokchung nung electronic osettsüset taila ayokba puogo. Anungji customers aser nüburtem dang item amaji mita alitsü mepishir. Electronic osettsüsetji bills aser vouchers amshia ayoker register süa alirtem dang nungi dang alitsü junger,” ta MCCI-isa metetdaktsü.