Elim Hall, DABA nung “Child Adoption” sentong ka agi

Dimapur, March 25 (TYO) : Honibarnü Elim Hall, DABA nung Nagaland nung ozüng alema tanur mesütetba tsütsü tangtetba tajung kati arudaktsütsü nükjidong nung aser tanur ka temeten wazüka yutsütsü tangatetba nung anogo khenü amungba “Child Adoption” shisadokden sentong kaogo.
Iba sentong ya State Child Protection Society (SCPS)-i nungita Prodigals’ Home (PH), Nagaland Alliance for Child & Women Rights (NACWR) aser Morung Express ajanga ayonga agi.
Prodigals Home Director K Ela-i, child adoption atema state inyakyim tajung ka tanga kanga rongdak nüngdaka lir kechiba süra “adoption” tenüng amer ozüng alema inyakba mesüra tanur ka temeten raksatsüba jenti ataloker aser ibaji ajanga mapang talangka lir külen tanur, kibong aser lokti ajak nung timtem adokdaktsütsü, ta ashi.
Naga lokti nung foster parenting/care aser adoption na tsüngda mependangtetba pur ano aika lir aser ibaji ajak ajungtsü mechi angatetdaktsütsü kanga tim, ta lai ashi.
Iba tebilemtsüji koktettsü atema alemli nungi kin ajak nungi tanur mesüba yimya bendener angatettsü meranga tezüluba nung ayutsü nüngdak, ta laisa ashi.
Lai, Naga nunger yimya nung mesüra CARA Adoption regulation 2017 kübok tanur mesütetba yimyatem kanga junga angatetba ajanga tanur ka temeten wazüka yutsütettsü aser kibong nung tepela bener arutettsü, ta metetdaktsü.
Iba sentong nung SCPS, Kohima nung Program Manager Renchumi Imti-i CARA inyakyim rateta ashi, Wondang Ki Charitable Foundation, Dimapur nung Director, N.T. Kikon-i “child adoption – Naga customary practices” onük nung ajemdaker jembi aser Heritage Publishing House, Dimapur nung Editor Dr. Asangba Tzudir-i akhi mapang nungi child adoption yimya koma benshia aru itemji rateta ashi.
Sentong tenzükdang Prodigals Home nung Asst. Director, Maong Jamir-i tarurtem pela agizük aser Nagaland Alliance for Children & Women Rights, Tir Asha Sanchu-i anküp tepela o jembi.