Elliott cricket asaya nungi anener

Luroi/August 22, 2018 (Agencies): South Africa nung asosang New Zealand nunger allrounder Grant Elliott-i pa cricket asaya format ajak nungi anenba sangdongogo. England Twenty20 Blast, North Group nung Birmingham Bears puri lenir ka ama jenjang trokbuba tongteta aniba sülen arishi küm 39 tain Elliott-i pa asaya nungi anentsü asoshi telemtetba agiba osang ya social media ajanga sangdonga liasü.
Elliott ya kanga dang aggressive lower-order batsman aser right-arm medium pace bowler ka liasü aser pa 2001 küm New Zealand-i mao tsüngda first-class asaya South Africa kübok Gauteng nungi asaya. Pai New Zealand nungi test 5, one-day internationals 83 aser Twenty20 internationals 17 asayaogo aser taoba küm Pakistan den asayaba World XI team nung densema liasü.
“Johannesburg nung tenzüker Birmingham nung tembangogo. Arishi küm 12 asüdang ni kü taküm nükjidongtem zülutena ayuba bilemteter aser itemji World Cup, international cricket aser county cricket asayatsü liasü. Ni asayaa aruba mapang ajuruba nisungtem shirnoki kü taküm jangratemtsüka kümdaktsü; nenok ajak dang pelar. Tembar aser kinungertem danga nenoki nungita yariba atema kanga pelar. Küm 27 jangratema asayaogo aser tarutsü atema kanga yongyaa atar,” ta Grant Elliott-i lemsatep.
2015 World Cup semifinal asaya nung Dale Steyn-i aonba ball six züktoka South Africa madak takok anguba ajanga pa ajaki tali jangja bilemteter.