Elton John-i Donald Trump sentong nung shilem magitsü

November 23, 2016: Nüngtugu kentener, Elton John-i US Tir menden atema shima alisang, Donald Trump inauguration nung shilem magitsü, ta Elton John’er otongdar kati metetdaktsü.
Trump-i election nüboyim sentong aika nung Elton John indang kentem tena liasü.
Presidential transition team züngsem kari BBC indang ‘HARDtalk’ sentong ka nung, January 20, 2017 nü Washington nung Trump Tir menden atema tenangzükba agiba sentong nung Sir Elton John-ia shilem agitsü, ta jembia liasü.
John atema otongdar, Fran Curtis-i, email ajanga New York Times dang, “Osang tai. Pai shilem magitsü,” ta metetdaktsü.
Tan hopta tetenzüklen Presedentail transition team nung züngsem, Anthony Scaramucci-i BBC sentong, ‘HARDtalk’ dang, “Tenangzükba agiba sentong atema kenten sentong nung John-i shilem agitsü,” ta jembia liasü.
BBC sentong nungji Scaramucci-isa gay (tetsür o tetsür/tebur o tebur na shi nung medemba) temeten nung Trump tangatetba pusema liasü.
Pai, “Ni-a gay temeten atema jembir ka lir,” ta ashi.
“Ni kiyimba nung kasa temeten pusemer. Iba denji medema US putiotsü nung tang mezüng America Tir kati gay temeten pusema White House nung ayaoktsü,” ta Scaramucci-isa ashi.
Tir election atema nüboyimba mapang Trump-i ‘Rocket Man’ aser ‘Tiny Dancer’ ken densema Elton John indang kentem amshia liasü. Ajisüaka John-ibo pa menungit.
Taküm February ita nung The Guardian den jembidang Sir Elton John-i, “America tir election nüboyim nung kü kentemji shilem ka mesüdaktsüner,” ta jembia liasü.
“Ni British nunger lir. Ni Donald Trump ajuruogo, pai kü den kanga jungtep. Pa imtenren tangatetbaji pa tangatetba, kü tangatetbatem khenyongi balaka. Ni küm million aika Republican ka masü,” ta John-isa ashi.