Email ajanga miim osangtsüsang melemsatep: Hillary Clinton

Iowa, July 26 (Agencies): Email ajanga sorkar indang miim osangtsüsang melemsatepba olen ka Democrat yimtenren telok nungi candidate ka ama 2016 US Tir election nung tokteptsü renema alila, Hillary Clinton-i yashi Honibar nü metetdaktsüogo.
“Ni US Secretary of State menden abenba mapang kü indang email amshia sorkar indang miim osangtsüsang melemsatep ta osang jangjashitsür,” ta US north-central tsütsü, Iowa nung ayongba election nüboyimba sentong nung yashi o jembidang Hillary-i ashi.
Hillary-i US Secretary of State menden benoka alidang lai lar email account amshia sorkar indang miim osangtsüsang lemsatep saka lai yamaji inyakba miimbanga ayutsü meranger akok ta bilemtsü tenzükba ajanga Democrat candidate rong nung jenjang tajungba ngua alila, Hillary’er Tir menden abentsü alizüng nem tetsükdakba bener arutsütsü tenzüka lir.
“Hillary-i ochishia meinyakba yong vote agütsürtemi la dak tamang mekateti kümogo,” ta Iowa nung tentetba Republican Party ketdangser katia metetdakja liasü.
Hillary-i email ajanga sorkar indang miim osangtsüsang lemsatepba den sentakba osang jangjashitsü nükjidong nung bushisüngdang sentong ka agitsü asoshi US Justice Department-ia lemteta lir saka Hillary anema okadak ken o benoka la merenshitsü sentongbo renema mali.
“Hillary-i sorkar lenisütsü menden abendang email yokdangbo osangtsüsangji miim osang ka ama mezüngoki liasü saka tanübo kasaji miim osang ama züngshitsü tenzükogo,” ta State Department otongdar, Mark Toner-ia metetdaktsüogo.
Ano külen, lai ochishia inyak ta sayutsü nükjidong nung lar email ajanga yokba shiti 55,000 shi yimjak nung adoktsütsü temelaba ka Hillary-i State Department nem agüja lir.
Hillary-i 2012 küm Libya kübok Benghazi nung tentetba US Consulate kidang atalokba lendong den sentakba osangtsüsang densema tashishitsü osangtsüsangtem miimbanga ayutsü meranger ta la anemertemia metetdakja lir.