Eman Ahmed surgery agiba sülen seret 100 ajemogo

Mumbai, March 09 (Agencies): Brehostibarnü India nunger doctor temi ashiba agi, alima nung temang tulutila, temang tilaba kümdaktsütsü asoshi operation takok ngua agiogo. Operationg agiba sülen la sert 100 ajemogo.
Eman Ahmed Abd El Aty ya taoba mapang temang tozük seret 500 shi liasü. La Egypt nung kidang nungi kimai malui küm 20 shi liasü. La taoba ita ‘bariatric surgery’ agitsü atema Mumbai-i arua liasü.
“Eman March 7, 2017 nü ‘Laparoscopic Sleeve Gastrectomy’ takok ngua agiogo. La nem dang chiyungtsü tanük agütsüdar aser lai itemji agizükteta chidar. Pa temang anepalurtem atema teinyaktsüji joko, la temang nung timtem aliba ajakji anepalur Egypt-i tekeratiba nung yoktsübaji asütsü,” ta osang ka ajanga metetdaktsü.
Dr Muffazal Lakdawala, otongdar ajanga ashiba Abd El Aty temang tuozük seret 400 dak tajemba kümogo.
“Eman temang seret tuozük 100 shi ajemogo, aser treatment balala ajanga la anogoshia seret ajemdar,” ta lai osangbenertem dang ashi.
Iba Egypt tsürla ya Mediterranean port yimti, Alexandria nungi lir. La India-i taküm February ita 11 nü, la amentsü asoshi tayimtsü ka yanglushir, idakji mener temang anepalutsü asoshi aru.
Abd El Aty teyi-i ‘specialist weight-loss surgeon’ Lakdawala den October ita nung teno atema osang agitepa liasü.
Lar kinungertemi doctor tem dang ashiba agi, la tanur asüdang ‘elephantiasis’ tashidak putet koba ajanga la tetsüng aser temang nung tanga shilemtem awaker aser la iba ajanga mejajateter.
Iba ajanga la aiben strok süogo aser ano tanga tashidak; diabetes, high blood pressure, hypertension aser junga memejangba bendenloka liasü.
La India visa meshiba mezüngbo magizüki liasü, saka India foreign minister dangi tweet asüba sülen pa teyari ajanga la visa ngutet.
Abd El Aty mapang talangka atema ataa liasü, kechiyong tayimtsü kechaia la temang manemba atema India-i anir arutsü asoshi memolungi liasü.
India ya bendanglen nung temang anepalutsü asoshi arurtem atema tongtibang tesem ka kümogo.