Emergency ozüng atsülangshitsü akok: Erdogan

Ankara, September 29 (Agencies): Turkey linük nung benokba emergency ozüng mapang talangba küma atsülangshitsü bilemba olen ka Turkey Tir, Recep Tayyip Erdogan-i tanü, Brehostibar nü metetdaktsüogo.

Turkey nung tentetba tematiba National Security tenteti par linük benokba emergency ozüng taruba October ita tembangba sülen maneni talangba küma atsünglangshitsü ajungshiba sülen Erdogan-i tan iba olenji sangoktsür lir.

Turkey mitkar telok kati tashiyim agi linük indang yimsüsütsü tashi tamakok ngua taküm, 2016 küm July ita agitsü merangba sülen linük anemer nokdangtsü nükjidong nung Erdogan-i aniba Turkey sorkari par linük ajunga nung emergency ozüngji benoka liasü.

“Ozü linük emergency ozüng ita 3 atema dang benokba ajanga linük anema nokdaker nokdangtsü alizüng bilemba ama takok ngua meinyaktetba yong emergency ozüngji maneni ita 3 agi talangba kümdaktsütsü tebilemba lir,” ta Erdogan-i ashi.

Paisa ashiba agi, linük anemertem nokdangtsü atema par linük nung emergency ozüng küm ka shi benoktsüsa akümtsü akok.

Turkey sorkari emergency ozüng benokba sülen taküm July ita 15 nü tashiyim agi linük temzüng agitsü meranger aser parnok den sentakteper ajunga pua merenshitsü maparen tenzükba den külemi, iba maparenji US nung jenoka alir Muslim putir, Fethullah Gulen-i ajungmesoba ajanga atalok ta pa aija, Gulen Turkey sorkar nem amoktsütsü takhangba US sorkar den benoka lir.

“Tanü tashi nung Gulen den sentakteper aser Turkey linük indang yimsüsütsü tashiyim agi agitsü merangba maparen nung shilem agir ta temulung melemi bilember nisung 32,000 shi tepuokdak puoka lir,” ta Turkey Justice Minister, Bekir Bozdag-ia yashi, Bodbar nü metetdakja liasü.

“Gulen-i aniba FETO telok aser Turkey sorkar anema nokdaker Kurdistan Workers’ Party (PKK) na takok ngua nokdangtsü atema ozü linük emergency ozüngji talangba küma atsünglangshitsüsa akümer,” ta Erdogan-i par maparen metentsüba olen ka metetdaktsü.