Emmaus lenmang

Yisu sür shia aruba otsü nung Emmaus lenmang nung nisung ana ooya alidang tena nem majitetdaktsüi Yisu tena den atongsema aoba tatalokba nungji tanü ama Yisu tasü madak takok ngur shia aruba anogo bilemteta amongdang tanüla lesson aika angutsüsa ataloka lir. Yirusalem nungi Emmaus atongtsüba lenmang ya mile tenet shi talang ta Luke 24 nung shia angur. Iba lenmang nung parnoki mereprangtetaka Yisu den külemi aoba nisung anaji Emmaus yimtak alir kinungtsü aser kinungbo na (apuani) asü südi ta Laishirtemi ashir. Aji oda, tena ya Israel nunger asoshi alima yimli tasen ka arutsü imlaseta Yisu taküm alidang pa sülen anidakba teimla to ajak amajok ama kümer terata, tejashi aser tezüdang tia nung Yirusalemi nungi pei yim Emmaus-i meyipa aorba liasü. Atangji, tenati Yihuda nungertemi Yisu reshikangshia kangki nung angenlokba indang jungjunga meteta lir. Aji oda, tenati Yisu shia aruba osang tetsürtemi sangdongba indanga angashia lir. Tenati Yisuji ainker tuluka aser Yihuda nunger bendanger yimsüsüba talenba nungi alangzüktsü aru ta dang meteta liasü. Atangji, Yisu alimai aruba otsütem rongnung shia aruba yasa tongtibangtiba lir. Yisu asodang anüdoklen petinui tashitemetetertem  Bethlehem tashi anir arua Yisu külemaka aser Yisu tain kümer sayatenya tapu aika inyakaka, Pa sür shia maru asübo atangji paji ainker ka dang liasü. Aji oda, tsüngrem asünunga alima meimchirtemi külemba tanga tsüngremtem den kasasa süla. Ajisüaka, Yisu sür shia aruba agi Paji tsüngremtem madak Tsüngrem dang masü saka tasü tsüngremtem madak atangji taküm Tsüngrem ta kuli sayutetogo. Ajisüaka, Emmaus lenmang nung jajaba nisung ana yagi Yisu shia aruba osang dakji mamang, iba jagiang tena mulungjang tejashi agi sünga liasü. Iba anogo nung tenati Yisu par kidangi maniok asübo tena Tsüngrem nungi pilabaji teti atema tepilar süla aser teti takümdaki aotsü melen teti tesamadaki ola. Kodang Yirusalem nungi Emmaus yim atong tenati mereprangtetaka tena den külemi sensaksema aruba dang masü saka tena dang tamashi shia arütsüsangji tenati meima tena kidangi aniok. Iba sülen kidangji kodang parnok külemi chiyongtsü asoshi sarasadem, idangji dang ki kibur anaji tanüla tenük lapoka shia arusang Yisu Khrista-ji reprangtet. Tena asoshi Yisu reprangtetba mapangji Laishiba angatetba mapang liasü. Iba aonungjisa tena kidangji anisüngzüka melitet Yisu shia aruba indang kuli asütsü asoshi Yirusalemi meyip. Tena Yisu den külemi jajaaka tenati par kidangi anioker tena akaba chiyongtsü melemsatep asübo Yisu shia aruba takok aser tekümtetji tenati mengula. Aji oda, tenati mena melitet Yirusalem tashi oagi Yisu nütsüng terka den külemi kilong nung adenshia alirtem dang Yisu shia aruba kuli tesüdak nung iba takdang jagi Yisu aru aser parnok rongnung nokdak. Iba mapang tashi nung tamanger telongjem (arogo) metenzük liasü. Ajisüaka, nütsüng ter ana den parnok medemer aser kinungertem ki ka nung adenshibaji sentep kidang adenshia akhi shin o aser tatalokbatem indang jembir amai liasü. Aji oda, asenok ajak asoshi tesüngmangtsü aser tekümdangtsü kaji, sentep kidang tangur kari Yisu shia aruba kuli tesüdak nung parnok ajaki ngua Yisu arua nokdak nung parnoki Pa nüng sanga külemtsü melen tsübua adok aser parnoki Yisuji temenen tanülaa ta bilem. Asenoki kümsa küm tenla kidang adenshili Yisu külemli ta aruba mapa nung tebilemdangtsü tesem tajung ka yangi angur. Tanü asenok tendaka tenla kidang Yisu tanüla o temenen tanüla na mebendangtetba amangba purtem aika lir. Asenoki Yisu dak amanger saka Laishiba mangatetba agi tamang tulu küma meintetter. Asenoki Yisu dakbo amanger saka Pa asenok den aliba asenoki memetetter. Asenoki Yisu asenok melen asü tabo amanger saka asenoki Pa tanaben asenok anir arutsü ta asüba nung mamanger. Emmaus lenmang ya asenok anogo shia jajaba lenmang lir. Iba lenmang ya Yisu ajurua pei kidangi, tetezü, pei mulungjangi aniokba lenmang lir. Aji oda, asenoki mereprangtetaka, teti Yisu Khristaji asenok den lir ta amangdgi. iba tamang aser teimla  nung   Shia aruba Tsüngrem chir Yisu Khrista tenüng sangdi.