ENCSU purtemi MBBS azüngtsü menden meshir

Dimapur, October 03 (TYO): Nagaland government-i Backward tribe atema MBBS menden pezü shiteta yutsüba magütsüra October 5, 2016 nü nungibo ano longkak ait tenzüktsü ta Eastern Nagaland College Students’ Union-i metetdaktsüogo.
Iba longkak aitba sentong ya Tuensang, Mon, Kiphire aser Longleng district nung tama agitsü aser iba sentong tenzüka item district-tem nung government gari mesenzüdaktsütsü ta ENCSU sangdong ka ajanga metetdaktsü. Iba sentong ajangajia government-i ENCSU akangbaji mataloktsüra ano item district pezüprongla nung government office shibangtsütsü aser aano iba sülenjia governmenti kaketshirtemi akangbaji mataloktsüra mataloktsü tashi Eastern Nagaland ajunga mokdangtsü ta ENCSU sangdong ajangasa metetdaktsü.
Iba longkak aitba sentong nung emergency service atema senzürtem, sepaitem, magistrates aser tatidang agütsütsü pur kaketshirtembo senzüdaktsütsü ta parnokisa metetdaktsü. Iba longkak aitba mapang Eastern Nagaland nung government mapa nung tenzükertem ajak pei pei mapa inyakdak alitsüla ta parnokisa metetdaktsü.
Iba longkak aittsüba sentong ya Kohima nung September 30 nü Eastern Nagaland Peoples’ Organisation (ENPO), Eastern Nagaland Gazetted Officers’ Association (ENGOA), Eastern Nagaland Women’s Organisation (ENWO), Eastern Naga Students’ Federation (ENSF) aser Eastern Nagaland Peoples’ Union, Kohima (ENPUK) nungi lenirtem dena senden ka lia lemtet ta ENCSU sangdong ajangasa metetdaktsü.