Enforcement Directorate-i March 18 nü Vijay Mallya jaoker

New Delhi, March 11 (Agencies): Hokolbarnü Enforcement Directorate (ED)-i sentsüh alisang, Vijay Mallya dang March 18, 2016 nü tashi nung sentsüh crore 900 aliba dak sentakba nung parnok matsüngdangi arutsü jaokogo.

Tang Mallya England nung lir. Mallya-i IDBI dang sen crore 900 apuba atema Central Bureau of Investigation (CBI)-i pa nem look-out notice agüja liaka pai March 2, 2016 nü India toktsü ao.

Taoba mapang yi shishilembar tetsüdi, Mallya Bank 17 dang sen crore 9000 dak tema sentsüh lir aser parnoki pa anema Debt Recovery Tribunal nung ken o benoka lir.

Hokolbarnü ED-isa item bank 17 prongla dang Kingfisher Airlines nem sen aputsüba dak sentakba kakettem ajak anepalua bendenang, ta tuyuogo.

Mallya-i IDBI dang nungi sen apuba magütsütetba atema bushisüngdangba dak sentakba nung Brihostibarnü ED-i IDBI bank ketdangsertem aser Kingfisher Airlines ketdanger kar jaoka liasü.

March 2 nü Vijay Mallya tayimtsü ka nung khu taret tenet bener London-i ao.

Tanep Mallya-i, pa jena aor ka masü aser pai linük temzüng tashi angatsü ta shiogo.

Tanep mejangjaba tesem ka nungi Mallya-i twitter ajanga, “Ni ya International shishilembar ka lir. Ni mapangshia India nungi aser India tashi ainlen jajar. Ni India toktsür majen aser ni jena aor ka masü,” ta ashi.

“India nunger MP ka ama ni linük temzüng akhümsübur aser tashi angatsü. Asen temzüng inyakyim ya tajung aser ni akhümtsübur,” ta paisa ashi.

Mallya-i media-i pa anema pa anema inyaker, ta aitsüogo.

“Kodang media-i anema apuso tenzükdir ibaji misem tulu ka küma jangrua atangji aser ochiji mitsü küma aronger. Ni küm aika (parnok) yaribaji media ketdangsertemi mamatoktsüla, ibaji tezüluba nung lir. Tangbo TRP ajangzüktsü atema yazü jembir asü (?)” ta pai asüngdang.

Mallya-isa, media-i pa indang kiojen rongsentem sangdongtsüla ta jembiba aitsüogo.

“Iba tetezü Bank temi kü indang rongsen memetet asü mesüra kü indang Parliamentary osang reprangdangtsü (?)” ta ashi.

Mallya-i pa aliba tesem meimshir, ajisüaka osang ajanga ashiba agi, UB Group chairman aser Rajya Sabha züngsem Mallya ya London nungi north tsütsülen gari nung ghonda ka shi jajar atongba tesem ka nung par kidang lir.

Bodhbar nü Centre sorkari Supreme Court dang Mallya March 2 nü India toktsür ao ta metetdakja liasü.