Enforcement Directorate-i Vijay Mallya April 2 nü jaoker

Mumbai, March 18 (Agencies): Hokolbarnü  Enforcement Directorate (ED)-i shishilembar tetsüdi, Vijay Mallya dang April 2 nü agency matsüngdangi arua IDBI Bank dang sen crore 900 apuba dak sentakba ken o nung kuli agüjang, ta metetdaktsüogo.

Taoba hopta ED-i Mallya dang March 18 nü parnok matsüngdangi arung ta tuyua liasü, ajisüaka yashi Brihostibarnü Mallya-i email ajanga ED dang pa iba anogo nungji marutettsü, anungji April ita tashi pa nem mapang agüjang ta mepishia liasü.

Yashi ED ketdangsertemi, Mallya April ita tetenzüklen parnok matsüngdangi arutsü ta metetdakja liasü.

ED director, Karnal Singh-i Mumbai nung aliba Ballard Estate nung agency indang regional headquarters semdangogo aser iba mapang nung ketdangsertemi pa den iba onük nung o lemtepa liasü.

Ano külen tanga osang ka nung ED-i A Raghunathan (taoba mapang chief financial officer (CFO), Kingfisher Airlines) aser Ravi Nedungadi (UB Group CFO) na dang iba ken o dak sentakba nung asüngdangyaogo.

IDBI bank dang sen crore 900 apuba dak sentakba nung ED-i prevention of money laundering act (PMLA) kdbok Vijay Mallya, Raghunathan, Kingfisher Airlines aser ketdangsder pezü anema ken o benoka lir.