Engineer-in Chief, Er. K. Miachieo den tepila sentong agi

Dimapur, February 28 (TYO) : February 28, 2017 nü Conference Hall, Electricity House, Kohima nung Power Department-i par department nung Engineer-in-Chief, Er. K. Miachieo den tepila sentong ka ayonga agiogo.
Tepila sentong nung Er. K. Miachieo-i, Tsüngremi pa yaria ano taküm nung jenjang tasen ka moatsüba asoshi pelar. Ni iba department nung SDO (Electrical) ka ama 1982 küm nungi inyaktsü tenzük, ta tesüiba mapang bilemteta ashi.
Department nung aliba ketdangsertem rongnung nisa tia takatiba lir kechiba süra kü den külemi inyaker ketdangsertemi ni ya tashi nungita arua kü mapang takok ma nung tembangdaktsüogo, ta pai ashi.
“Taküm ya tangazükba agi sünga lir aser asenok masü tashi angazükjen angazüka alitsü, anungji Engineer-in-Chief tasenba dena kü den ama kasa tejangraba nung yaritepa inyakangma,” ta pai department nung inyakertem ayongzük.
Engineer-in-Chief tasenba, Er. G.Chishi-i Department nung Engineer-in-Chief post amenokba aser joko memunui renemtsü aliba Kohima nungi Dimapur tashi 220 KV line atsütsü shisatetba atema Er. K. Miachieo den kanga pelaba lemsatep.
Kohima nungi Dimapur tashi 220 KV line atsüba mapa.
Secretary (Power), K.I.Yanger IAS-i, mapa nungi anisüngzükba mapangji aseni inyaktet yutsüba aser takok angubatem meyipa reprangdangba mapang ka lir. Er. K. Miachieo ji aoashi temetet aser akhümket nisung ka lir. Pai küm 35 tashi mapa takok ngua abenba asoshi tenüngsang agütsür, ta ashi.
Minister for Power, Kipili C. Sangtam-i, tang Engineer-in-Chief mapa nungi anisüngzüksangi telemtetba shitak agia department aniogo aser pa ano taküm tajung lia mapa nungi anisüngzükba asoshi tenüngsang agütsür, ta ashi.
Minister-i, nüburtem asoshi mapa tajung inyakbaji Tsüngrem asoshi lir anungji department nung inyakertem ajaki nendaka aser bendanga agüja inyaktsüla kechiba süra tanü inyakba mapatem jagi tarutsü jungdaktsütsü, ta ashi.
Sentong nung APEN Tir, Er. Shikato Sema, Additional C.E. (Civil), Er. Vitoshe Rochill, Director NRE, Er. T.S. Angami, tongtibang nisungtem aser department nung telen balala nungi o tatsütsü jembi.
Iba sendong nung Additional C.E. (D&R), Er. Khose Sale menden liasü.