Engineer temi tenüng tajung meyipa bener arutsü ajungshitep

Kohima, August 23 (TYO): State renlokdaktsütsü aser tejakleni odaktsütsü atema Naga engineer temi pei lemzükba mapa nendaka inyaktsüla ta tanü tayongzükba ka agütsüogo.
Hokolbarnü Federation of Nagaland State Engineering Service Associations (FONSESA) indang annual conference alidang FONSESA vice president, Limanaro-i iba tayongzükbaji agüja liasü.
FONSESA ya Nagaland sorkar kübok department balala aser tanga teloktem nung inyakba engineer tem den Engineering Departments ajak lokteper tentetba telok ka lir.
Loktilibai Engineer tem ya state atema tagitsüpurtem ka ama züngshidaktsütsüla. Ajisüaka, tanü lokti engineer tem junga merepranger kechiyong engineer temi tim masüba mapa balala inyaker. Anungji FONSESA-i iba inyakyim melenshitsüla aser loktliba nung tenüng tajung bener arutsüla, ta Limanaro-isa ashi.
“Linük yangerba wadang nung engineer temi tongtipang shilem agir aser technical teyari medeni terenlok mapa atema policy shitak meyangluteter. Linük yangerba wadang nung Engineers aser Technocrats ji tongti ta teti züngshia arur anungji asen state renlokba nung Engineer tem indang tebilemtsü aser teinyaktsü lir,” ta laisa shisem.
Meimchir libaliro tajungba küma aoba nung engineer tem shisatsü ajanga tongtipang shilem agia arur, ta Retired Chief Engineer of PWD (National Highway), R Temsutemjen Aier-ia o jembidang ashi.
Sorkar indang maparen balala nung terenlok mapa inyaktsü atema Engineer tem shimer anungji Engineer temi iba tebilemtsüji bener akokba tashi nung terenlok bener arutsü atema inyaktsüla ta R Temsutemjen-isa ashi.
Sentong nung tetushi süa jaokerji Retired chief engineer PWD (Mechanical), F Putsure liasü aser pai sorkar department balala nung engineering wings tsüngda tesentaktep tajung alitsü atema tayongzükba agütsü.
Sentong nung mendenji FONSESA vice president Thepfusalie Guozi liasü, V Nakhro-i temoatsü meshia sarasadem, Thanyalo aser Nyoingam Konyak nati ken ka aten aser joint secretary Alemtoshi Imsong-i anküp tepela o jembi.