Engineering azünger ka asüba ken o bushitsü asoshi lokti balalai akhanger

Guwahati, February 26 (Agencies): North East state balala nungi Guwahati nung arua azünger kaketshirtem lendong balala nungi kümzüktsü atema sentong balala yanglutsü asoshi National Adi-Mishing Students’ Coordination Committee aser Adi Students’ Union ajanga Assam Chief Minister, Sarbananda Sonowal nem takhangba agütsür.
Guwahati nung nijai lapokba kaket reju ka nung civil engineering azünger, Katem Dai tawa asüba ken o timi bushisüngdang asütsü asoshi Arunachal aser Assam nungi arua azünger kaketshirtemi tentetba telok- NAMSCC aser ASU ajanga sorkar nem takhangba agütsüogo.
“Kaketshir ka (Katem Dai) asüba ajanga iba tesem nung azünger kaketshir molungjang nungi temolung malemba ka arudaktsür. Iba ken o nung telok balala nungi shilem magitsü asoshi onoki ajungshir,” ta kaketshir lenir, Buteng Tayeng-i ashi.
Arunachal nungi arua azünger, Dai asüba ken o nung tekeraba nung obendang agütsütsü asoshi item kaketshir telok ana nungi ketdangsertemi Sonowal Hokolbarnü ajuru.
Civil engineering azünger Dai ya kasa Arunachal nungi arua azünger kati February 20 nung tepset, ta ken o benoka lir.
“Dai asüba ken o ya police temi bushisüngdang asütsüla aser kaketshir tem temolungjang nungi tetsübu samadaktsütsü asoshi ochi obendang agütsütsüla,” ta Tayeng-isa shisem.