England cricket asayartem BCCI nungi sen angutsü atar

New Delhi, November 20 (Agencies) : England cricket team India nung joko anogo 18 buba amunger aser Memorandum of Understanding (MoU) benokba sülen parnok nem BCCI-i daily allowances agütsütsü atar. Iba sen agütsütsü atema linük ana indang cricket board temi sign asütsü nüngdak.
Supreme Court-i test asaya asem asayaba mapang asaya shia sen lakh 58.6 (approx) agütsütsü telemtetba agütsüogo, iba sen nung ya parnok nem daily allowance agütsütsü inoksema mali saka MoU inyakyim ajanga dang agütsütsü.
England nunger cricket asayartem nem iba sen magütsüba ajanga parnok kangabo tim matemer ajisüaka tang India nung sen nokdangba maparen agi parnok ket nung aliba tagila sen agimadar.
“Hao, England nunger asayartem nem BCCI-i ano allowance magütsü lir,” ta England team nungiter kati pa tenüng memetetdaktsüi ashi.
England nunger asayar shia nem anogo nung sen pound tenemnem agütsütsü lir. Ibaji kodang India sen kümdir parnok nisung shia nem India sen 4200 agütsütsü adoker.
Angashiba agi Match official tem aser India nunger asayartem nembo parnok tangotsü tim sen agütsüogo.
Osang ajanga ashiba agi tang England nunger asayartemji pei credit card aser parnok manager-i tataktet kaka inoktsüba India sen amshia arur.
Iba dak sendakba nung BCCI secretary Ajay Shirke-i ano kecha memetetdaktsü. Ajisüaka pai ECB manager Phil Neale dangi England team nem BCCI-i sen kechiba magütsür ibaji rasaa shia shidi ka züluogo, ta kasa nisung jagi ashi.