England-i New Zealand madak takok angu

Christchurch, Metsüremi 10 (Agencies): Küptoknü (Saturday) Hagley Oval nung One-day international (ODI) cricket asayamung tatembangbuba asaya nung Jonny Bairstow-i tanabuba century ngutetta England team-i New Zealand team madak wicket 7 agi takok ngutetogo. Iba asayamung nung asaya pongu asayaba nung England-i 3-2 agi koktetogo.
Iba asayamung match pezübuba Dunedin nung asaya liasü aser iba asaya nung Bairstow-i ball 58 nung run 138 yanglutet. Pai ‘boundaries’ 8 angu aser ‘sixes’ 6 ngua liasü. Batting atema tetemjen ‘pitch’ ka nung run 61 yanglusang Alex Hales aser Bairstow na sentepa run 155 yanglua liasü.
Final asaya nung arishi küm 28 tain Bairstow-i boundary tukububa züker alidang New Zealand nunger bowler Trent Boult-i, Bairstow run 104buba nung out sütsü. Joe Root (run 23 not out) aser Ben Stokes-i (run 26 not out) nati England team takoki ani. Asaya tatemi Ben-i ‘six’ ka züka asaya tembang. England team-i over 32.4buba nung wicket asem out sür run 229 yanglutetta liasü.
“Middle order batting asüba dang nungi opener ya balaka lir aser kü mapaji century yanglua asaya akoktsüsa run yanglutsübaji lir,” ta ‘man-of-the-match’ angusang, Bairstow-i ashi.
Tanabuba innings asaya nung New Zealand team-i run 223 dang yanglutet aser England team-i parnok batsman ajak out sütsü.
Iba asaya over 27buba tashi nung New Zealand team pur wicket 6 out sür run 93 dang yanglur liasü. Mitchell Santner-i run 67 aser Henry Nicholls-i run 55 yanglutet aser tena sentepa run 84 yanglu.
New Zealand team nungi Ross Taylor-i final asaya nung shilem magitet. Rasemnü (Wednesday) asaya pezübuba nung New Zealand-i wicket pungo agi takok anguba asaya nung Taylor tepi (thigh) nung timtem adoka liasü. Pai iba asaya nung run 181 (unbeaten) yanglu.
Iba asayamung nung England nunger asayar Chris Woakes-i wicket 10 agi ‘man-of-the-series’ ngutetogo.
“Asaya nung bowler temi shilem tajung agiogo. Onoki New Zealand team rongshia asaya akoktsü asoshi maongka aika yanglutet,” ta Morgan-i ashi.