England nunger lanur kati ball 25 nung runs 100 yanglutet

Dubai, Metsüremi/March 22 (Agencies): England nunger cricket asayar Will Jacks ya par linük nung kangabo nüngtugu asayar ka masü, saka Brehostibarnü arishi küm 20 tain yagi Dubai nung cricket asaya ka nung over ka nung six trok tashi agiteta ball 25 nung runs 100 agitet. Tia maka England nunger lanuri junga asayaba ya otsü kaket-ibo maitsü, kechiaser iba asaya ya official status agüja mali.
Dubai nung Lancashire den T10 cricket asayaba mapang Surrey nungi Jacks-i ball 30 nung four ti aser six 11 agiteta ball 30 nung runs 105 yangluteta par telok nungi wicket asem tashi out sür runs 176 yanglutet.
Telok anaprong asoshi iba asaya ya pre-season fixture ka lir, aser parnok ya taruba ita nungi county season asayatsü asoshi renemshiba mapang ka lir.
Iba match ya official jenjang agütsü asübo Jacks-i century yanglutetba yagi Chris Gayle otsü raksatsütsü liasü. Gayle-i 2013 IPL nung ball 30 nungi runs 100 yangluteta professional jenjang nung runs 100 tekeratiba nung yangluteter küma liasü.
Iba asaya temer osangbener den jembiba mapang, “Mezüng ball nungi ni kanga junga azüktsü merang. Overs ishika sülen ni ball ajak nung six azüktsü merang aser six pezü azükba sülen ni yangi six trok züktettsü ta bilem. Ni iba amaya tamalen masayatet aser iba takok ya ni teti kü mulung nung ayutsü,” ta ashi.
Iba asaya nung Lancashire teloki wicket teku out süa runs 81 dang yanglutet, kong Surrey nungi Gareth Batty-i runs 21 agüja wicket pezü out sütsü.