England Test cricket captain Root shimogo

London, February 13 (Agencies) : Cricket asayadang batting kanga junga atasang, Joe Root, taoba mapang captain Alastair Cook melena Hombarnü England Test cricket team atema captain shimogo aser pa melena vice-captain asütsü asoshi all-rounder Ben Stokes shim.
England Cricket Director Andrew Strauss-i tena shimtsü benokba sülen England & Wales Cricket Board (ECB) mendenbuba Colin Graves-i Deobar nikongdang tena shimtsü mulunga agizük.
“Taoba hopta Alistair Cook captain nungi aluba sülen tatembang telemtetba magidang Strauss-i tongtibang asayartem aser coach kar den ano head coach Trevor Bayliss nunger den ajurutepa sensaksema liasü,” ta ECB sangdong ka ajanga metetdaktsü.
“Joe Root ya England team nung captian asütsü asoshi kanga tetemsü. Pai iba mapa agizükba agi ni kanga pelar aser pa captain akümba ajanga team jenjang tajungba akümtsü,” ta Graves-i ashi.
“Ni pa den phone ajanga jembidang pai iba mapa tasen asoshi nema tanga bilemba aser yongyaba pa ola nung angatet. Joe-i cricket kanga junga asayar aser külem asayartem, selector tem aser ECB-i pa akümtsüpur. Tetenzük nungi pa den yariteptsü asoshi asayar tejentem aser lenirtem pa den lir,” ta pai shisem.
Root-i December 2012 nungi Test asaya nung mezüng shilem agitsü tenzük aser 2015 küm Cook atema vice-captain inyak. Pai test century 11 yanglua aliba rongnung mezüngbubaji 2013 May ita Headingley nung yanglu. Pai tang tashi nung Test runs 4,594 yangluteta lir aser ICC ranking batsman tajungtiba rongnung tasembuba jenjang nung lir.
Pa captain ka ama shimer mezüngbuba asayaji South Africa den July ita nung asayatsü.
“Ni England Test captain shimba ya ni asoshi maongka ulura lir. Iba mapa ajanga ni tali ajemaludaktsür aser team anitsü kanga yongyar,” ta England test captain 80buba, arishi küm 26 tain, Root-i ashi.