English aser Nagamese oshi ana bushitetba temesüktep indang medemdangba aser ku temepeshiba olen kar

~ Rev. K. Mar Pongen, Dimapur, Nagaland.

Asen Aoer otsüla oboula nunger otsü agi ashiba agi, mezüngbo asenok number züngyazüngbaji 10 (ter) tashi dang liasu ta angazüker. Saka kenü ki asütsü süra mejem azüngdang ter nung jagi joko ter ka, ter ana ta temaleni renloka tua züngtet aser ajak kanga pelatepa liasü ta angazük. Ano English oshi yaa küm 2000 tejaklen kodang Rome nunger tashi tait nüngtugu yimsüsür Jelius Caesar British limai (ISLES) aru, idangji ashiba agi English oshiji mali asü ta Randy Cloud-i züluba record ajanga ashir.”The rise of English language is a truly remarkable feat.When Jelius Caesar landed on the British Isles 2000 year’s ego, the English language did not exist”. Tanem tanemi parnok ishikati English oshi oyimji bushiteta aser bendentepa yanglushia jembia tenzük.English oshi yangluteta jembitetba ya atangji tesüngmangtsüka lir.Iba oshi ya……….
1. O tamendakdak kecha balaka tejangja mali asü.
2. O tera aser tetezü (Root meaning) tejangja aika mebushitet.
3. English oshi oyim rasaralemtemji tanga oshitem oda Greek, Latin, German, French, Danish aser ano tanga oshitem aika bendena chibo ka nung molosa-a yangluba amai liasu. “The English language is a melting pot of words and pharses derived from Greek, German,Latin,French,Danish etc.”
4. English oshiji junga meyanglutetba mapang nung orentemji shitak timi angatettsü kanga tasak liasü. Tatishitsü ka dang,’The rain cats and dogs’
TANÜ ENGLISH OSHI KODA TONGTIPANG ASER NUNGTUGU
1. Englishji Miss world aser Olympic tetoktepba nung official language süa amshir
2. Tayimtsü aser Jahazs nung English amshir.
3. English nung computer nung amshiba nüngdak o tem ajak rizünga (stored) süa lir.
4. Shidi mail osangtsüsang bentepba timbaka English nung dang zülua benteper.
5. Alima kin oshitem ajak rongnung English oshijisa ajak dang nungi tongtipangba lir.
1600 Küm tsüngda aser tanü tashi nung medemtangrabang English oshiji kanga tesüngmangtsüka tepila tulu lir.
NAGAMESE OSHI INDANG
Mezüng Nagamese ya koda bushiteta jembia aru, iba indang ni kangabo memetet saka 1970s kümtem nungi Kohima All India Radio nungi bosti program ta sür onük balala jembia alu nung tsünüsenpongtsü metsüjangnatsü koda aser kodang azüng nung junga adoker item amala sentong balala yokbaji kanga jangrademtsüka anga-a liasü. Ajisür Nagaland nung tongtipang town-tem nung aikati sapua jembiasa aru aser tanemtanemi nisung aikati tongtipangsa lanurtemi kanga jangratepa jembimeso. Ajisüaka , ano shidakba oren oyim aika jungjunga bushiteta inyaktsü nüngdaka lir.
Nagamese indang tashi mait kar yamai……
1. O tamendakdak (base/foundation) tejangja bushiteta mali
2. O tera aser tetezü (Root meaning) tejengja mebushijemer
3. Nagamese o zülujang kecha maka nung Roman zülu dang amshitsüsa akümer.
4. Tanga oshi oda Assamese, Hindi, English tem nungi apudentsüsa akümer aser ano pei local oshitema karbo enoksemtsüsa akümer.
5. Yimdaklirtem aikatibo mejembiteter aser ano tanga tashi mait tem jenti alitsü akok. Anungji Iba Nagamese ya Naga nunger official language asütsüji metemsu ta ashitsübajia ken bilembo shidak dang lir , saka ano ken mapang agia asadangtepa inyaker tajung kar atoktetsüsa lenmang karbo lir asü ta bilemdangdaktsüner.
NAGAMESE AKABA TAJANGZÜK :
1. Tangar oshi apudena yangluaka joko aji temeja asen meyong rongsen ka kümogo aser iba atema anemer shinga tanü tashibo mali. Ibai Naga nungertem asoshi temoatsü ulura ka ta Tsüngrem tenüng kanga asanger.
2. Tamalenbo Billy Graham crusade mesüra revival crusade akadang kin 16 ji pei pei oshi nung Kanga benjatepba meyiba liasü, saka dangbo Nagamese oshi nung dang kin ajak asoshi meyiper.
3. Naga kin balala yongtsü nung dangbo ayongayonga Nagamese agi angatetteper.Town Arogotem semdangtep nunga kin balala sentep nunga joko Nagamese agi dang jembir.
4. Tongtipang town ajak nung shishilembartem asen Naga nunger masüba nisungtemia asen Naga oshi nung jembir.
5. Nagaland artsülen North-East nisungtem aikati asen Nagamese oshi ya jembiteter.
6. Tangbo yimdak yimten yimli yimsüsür aser tanishirtem office- i oa Nagamese agi jembia officer tulurtem den parnok nüngdaktem jembitetter.
7. Nagaland Baptist Churches Council(NBCC) ajanga nüngdak ta reprangteta joko Nagamese Baptist Association tentetja recognize sütsügo, ano ken kaket-a atokdaktsüogo aser Laishibaa atoktsüsa akümtsü. Nagamese Laishibaji karbo aria bilemer telok kari adokogo.
8. Yisu osang tajung sayutsüngiba mapa asoshia kanga tongtipang ka kümogo.
Tatem nung kü temepishibaji ya,oda asenoki tabensaba atadang mabensai süia odaktsüra tesülenbo tesasatsüka asütsüa akok.Topur tajung naro kajia topurjunga alidang mepetra remzüka orrbo sasatsü. Anungji asenok ajaki tali tajungba kümdaktsünüyong Ao senden, Watsü Mungdang, aser Ao students’ Conference-i Naga Students’ Federation-i Nagameseji Naga nunger official language masütsüla ta sangdongba nung tebu küma nungiter ta asüba ya ano nenoki ken meyiba reprangshia takoktsü lenmangtem kar teyudaktsünüa temulung nung aria bilemba aser temepishiba olen kar lemsateper.Tongtipang kaji asen kidang aser asen kasa Ao kin rongnungbo Nagameseji kenyongi mejembii asen Aoer ayak kümzüka wazüka ayutsüla. Aibelen aser magizüktetsü onük kar lira metongshitsüba pelashishia agizüktsü.