English-i New Zealand PM inyaktsü tenangzükba agiogo

Wellington, December 12 (Agencies): New Zealand Finance Minister, Bill English-i par linük Ato Kilonser tasenba inyaktsü tenangzükba tanü, Hombar nü agiogo.
Taoba N Zealand Ato Kilonser, John Key-i par linük madak küm 8 tashi yimsü asüba sülen taoba hopta ajungbena yimsüsütsü menden toktsüba sülen English-i Key melenzüka, tan Ato Kilonser mendenji benoker lir.
Wellington yimtiba nung tentetba Government House ki kilung nung sentong tajung ka agia, English-i tanü Ato Kilonser inyaktsü tenangzükbaji agia liasü.
“Ni N Zealand Ato Kilonser menden abentsü maongka anguba atema kanga pelar aser iba ajanga ni tali ajem aludaka kümdaktsür,” ta commerce & literature na degree abener aser taoba mapang aluyimer ka alisang, English-i ashi.
Par N Zealand linüki rongsenren jenjang tajung ajuruba mapang ka nung English-i tan Ato Kilonser menden ya benoker lir.
“Asen linük indang rongsenren jenjang tajung lir aser iba ajanga asen N Zealand nübur ajunga ajangzüktsü. Kü lenisüba kübok N Zealand sorkari nungdaka alirtem nem teyari agüja, parnok taküm jenjang tajungba kümdaktsütsü nangzüker,” ta pai yimsüsütsü menden abentsü tenangzükba agiba sülen sangoktsü.
English dak alaka, aser pa den yaritepa inyaktsü atema State Services Minister, Paula Bennet-a Deputy Prime Minister shimogo.