ENPO aser NTC-i asür SS Khaplang nem tetushi agütsü

Dimapur, June 17 (TYO): Eastern Nagaland People’s Organisation (ENPO) aser Nagaland Tribes Council (NTC) nati Honibarnü NSCN-K mendenbuba asür SS Khaplang nem akhümtsübu aser tetushi agütsüba sentong ka ayongzüka agi.
Iba sentong ya IMC Hall, Dimapur nung agi aser nisung noklang aika adenshia asür nem tetushi agütsü.
Peace activist, Niketu Iralu-i asür SS Khaplang-i inyakba mapatem ashidang, “Khaplang-i North west Myanmar nung Naga nungertem aser Chindwin ayong tashi parnok lushi Naga nunger aser linük den shilem ka kümdaktsü. Iba ya pai inyakba mapa rongnung tajungtiba ta züngshitsü akok” ta metetdaktsü.
“Asür Khaplang-i pa taküm piyong bendanga agüja inyak, alizüng tulu ayu aser temulung ajak agi inyak. Pai tatemsa zülua yutsüba shidi nunga, ‘Tsüngremi kü nem moatsüba ama ni asen nübortem nüjiso atema kü teinyaktsü inyakogo. Tang Nagaland nung lanuputui nenok den taintem yutsüba senmangji tejakleni bener aotsüla’ ta shia lir” ta Iralu-isa ashi.
Sentong nung NNPGs Working Group, convenor N Kitovi Zhimomi-i yokba osang Zopra Vero-i zünga metetdaktsü
“Asür SS Khaplang ji shinga dena medemdangtsü makokba ‘revolutionary’ lennir ka liasü aser pai Naga nunger meimba aser angatetba nung ajemdaker, pai linük tenzükba wadang nung nokdak” ta N Kitovi-i ashi.
Asür Khaplang-i shimtetba lenmang ajanga, asenoki külem nükjidong atema nangzükba aser inyakba mapatem meyipa reprangshidaktsür. Onok tangatetba aser arrtsü ajanga lemsar liasü, saka onok azü kasa dang liasü. Onok ajak alizüng aser nükjidong ka ayuba Naga nunger dang liasü, ta paisa shisem.
Pa asübaji South East Asia nung pei maitsü atema rarartem atema takoksa tulu lir. Tsükchirtemibo paji kiralongrar ka ama züngshi saka Naga nunger aser tangar aika atema, paji ‘hero’ ka aser linük meimer ka züngshir. Pei maitsü aser linüktem atema inyakba nisungtemi pa lenisüba akhümtsübua aruogo, ta NNPGs Working Group, convenor-isa metetdaktsü.
NTC Advisor, Z Lohe-ia o jembidang, “NTC-i asür Khaplang ji tebudi ka ama aser Naga nunger rongnung tebilemba abenba senso tajung ka ama akhümtsübur. Pai asenok nem teti bilemtettsü indang senmang tajung ka yutsür ogo” ta metetdaktsü.
Iba sentong nung ENPO tir, Khoiwang Konyak, CNTC nungi RC Ovung aser Nagaland GB Federation, tir Shalem Konyak nungertemia o jembi.