ENPO Delhi-i jaokba nükjidong yimjak nung metetdaktsütsüla

Dimapur, September 6 (TYO) : September 10, 2015 nü India sorkar aser Nagaland state sorkar nati kechi tangatetba nung Eastern Nagaland Peoples Organisation (ENPO) Delhi-i jaok’ar nübortem dang metetdaktsütsüla, ta NPCC K. Therie-i sangdong ka ajanga metetdaktsü.
India sorkari Naga nunger yimjung nung longjema aliba raksatsütsü atema inyakba mapatem magizüker. Parnoki Naga nunger lokti shilem aika lemsatsüogo. Naga yimten telok balala tsüngda nisung tepsettepba aser Naga nunger public ket nungi sorkar aikati sen saruba inyakyimtem indang tebilemtsü khuret ya India sorkari abentsü. Parnoki public timtemba meteta lir saka iba khuret atema Naga yimten teloktem dang tebilemba ka dang melemsateper, ta Therie-isa ashi.
Parnok alizüng atongtsü atema ketdangsertemi tasa atonga India sorkar aser Naga yimten teloktem tsüngda ceasefire lidaktsütsü inyaker. Kanga dang arrsanga telungpur telok züngokba aser ghonda 72 tsüngda telungpur telok tentettsü ajungmesoba aser ano miima ENPO semdangba aser sen crore 300 agütsüba, mapang shia ENPO jaokba aser Nagaland Frontal State takhangba agütsüba ajakji India sorkari indang tasa lir, ta paisa aitsü.
K. Therie-isa ashiba agi, Miima olemtep aliba aser tamaitsü tenüng zülutepba aser tanga teloktem den ceasefire alitsü nangzüktepa sülen olemtep alitsü memulungba ajak jagi India sorkari nendaka meinyakba jungkai adoka sayur.
Nagaland nung MLA 60 ji nübortemi shimtetba lir saka tesüiba mapang lennirtem memesük parnoki nübortem atema meinyaker. Parnoki tashi aser sen dang aginür. India sorkari Nagaland Legislative Assembly tashimeiti aliba nung maongka agia parnok alizüng atongtsü atema mapa inyaker, ta NPCC tir-isa sangdong nung shia lir.