ENPO-i oil tanker anisang den handyman kümzükogo

Noksa nung ENPO-i kümzükba nisung ana den ENPO rescue team angur.

Kohima, Monupii/May 03 (TYO): Taoba ita, Rongchii (April) 22, 2018 nü mejangjaba nisungtemi puer aoba oil tanker anisang aser handyman na tanü nguteta kümzükogo.
Eastern Nagaland Public Organisation (ENPO) tatong Tir, Kekongchim-i ashiba agi, ENPO Tir, Koiwang Konyak leniba nung ENPO nungi züngsem pongu akumba team kati tena bushi tenzük aser tesüsa puer aoba nisung anaprong kümzükogo.
Paisa, tanep mejangjaba tesem ka nungi ENPO team-i nisung anaprong kümzükogo, ta ashi.
Rongchii (April) 22, 2018 nü prangpong bena alir mejangjaba nisung kari Tuensang district kübok Helipong yimdak nungi nisung ana- oil tanker anisang, Tularam Buragohain aser pa den teyariteper, Adman Surin na puer oa liasü.
Iba sülen Rongchii 27, 2018 nü Nagaland nung totzü dak sendakba tentettemi nisung anaji kümzüktsü atema state sorkar nem ghonda 48 züngzükja liasü saka iba takhangba mataloksüba ajanga Nagaland nung totzü belener aser retailers tentettem- Kohima Petroleum Dealers Association, Dimapur Petroleum Dealers Association, Nagaland Tanker Transport Association aser Oil Tanker Drivers Union-i Tentonü (Hombar) nungi tenzüka anogo telemtet makai longkak aita totzü ayokba outlets ajak shibanga liasü, ajisüaka nüburtem timtemba bilemja parnoki atsüanema longkak aitba thinena liasü.
Iba dak sendakba nung ENPO-i oil tanker anisang aser handyman meyirutsüi chiokba atema tena chiokertem dang pelaba metetdaktsüogo.
ENPO-isa, iba ama kanga tongtibang mapang ka nung Naga nunger taginüba angateta nisung apurtemi ENPO Dec. 18, 2007 Tuensang Summit Resolution akhümtsübua inyakba atema pelar; Iba bangzüng nung ENPO tesem nung amokmeren masutsü, azü medokshitsü mesüra meraratsü shia lir, aser iba senden nung adener züngsem ajaki tenangzükba agia ibaji benshitsü aser Naga nunger rongnung telongjem aser tesünep alitsü atema ENPO public aser Eastern Nagaland National Workers telok ajak nungi bangzünga lir, ta metetdaktsü.
Union balalai sorkar nem ghonda 48 züngzüktsüba mapang tembangba sülen Tuensang DC-i ENPO dang tiyongtsüi aita inyaktsü mepishia liasü.
ENPO-isa, Tuensang district administration, police, security, tribal tentettem aser ENPO kübok tongti tentettemi amalitepa inyakba ajanga gari anisang den handyman chiokogo, aser iba atemaji ajak dang pelar; tarutsü nunga kasa tangatetba tajung nung longjemer inyaktsü imlar, ta metetdaktsüogo.