ENPO-i Sovereign Republic of Freeland noktanger

Dimapur July 10 (TYO) : Eastern Naga People’s Organization (ENPO)-i “Sovereign Republic of Freeland” (SRF) ta ajaba telok noktangtsü atema telemtetba agiogo aser ‘Eastern areas’ nung temelaba melii ‘revolutionary’ teloktem tentettsü memelatsü ta bangzünga renemba metetdaktsü.
Lokti tentet balalai tejashi metetdaktsüba aser amokmerenba sülen Honibarnü ‘SRF Mon unit’ loksaba osang angazüker aser ENPO-ia Honibarnü iba telok noktanger ta osang metetdaktsü.
July 7, 2016 nü ENPO-i Sovereign Republic of Freeland lia ENGBU, ENWO aser ENSF nunger den külem senden ka jatepa amendang telemtetba aika agi.
Telemtetbatem rongnung mezüngbubaji, ENPO indang telongtet nung Sovereign Republic of Freeland ta ajaba telok noktangtsü aser SRF züngsemtemi pei kin Hoho-i meteta aser tetuyuba kübok eastern Nagaland nunger atema inyaktsü indang lir.
Tanabuba nung, ENPO telongtet nung SRF indang establishment/office agientsü aser iba dak sendakba nung ENSF nem tashi agütsütsü bangzünga renem.
Tasembuba nung eastern Nagaland telongtet nung temelaba magii teloktem tentettsü memelatsü ta lemtet aser ano ENPO ketdangpurtem, tribal hoho lennirtem, teloktem aser noktanga aliba SRF züngsemtem anema amokmerenba mesüra iba mesükba mapa inyakba magizüktsü ta senden nungsa lemtet.
Tan serbo ENPO den asüngdangya asüba sülen ang eastern Nagaland nung alirtem dak sendakba osangtem sangdongtsüla, ta ENPO-isa bangzünga renem.