ENPO teloki state balaka meshiba nungi matsüngshir

Dimapur, August 19 (TYO) : Tawa India sorkar o NSCN-IM telok na tsüngda Naga yimten tebilemtsü ken o tatembang küma latettsü asoshi tajemdakdak tongtibang onük kar mulungtepa renemba sülena Eastern Nagaland Peoples’ Organisation (ENPO) purtemi maneni parnok asoshi state balaka meshidagi. Parnoki tang aliba Nagaland kübok masü saka parnoka state balaka Frontier Nagaland ta jatetter linür.
Tan August 14 nü NSCN-IM teloki Naga yimten nüjiso anguba anogomong sentong nung adentsü asoshi jaokertemi jembiba mapang, ENPO leniri parnoki Frontier Nagaland akümtsü asoshi nokdakba maparen nung NSCN-IM telokia yaridaktsüner ta metetdakja liasü. Ajisüaka, NSCN-IM teloki Naga nunger lushi tangjema aliba ajak yimten ka kübok alitsü asoshi inyaker.
ENPO tir, Wb.Khoiwang Konyak-i osangbener kar den jembidang ashiba agi,” Eastern Naga purtemi Frontier state akümtsü akangba aser Naga nunger lushi ajak yimten ka kübok alitsü asoshi inyakba mapa ana ya balala, anungji kati ka anema inyaker amai mereprangtsüla. Ibayongji, onoki NSCN-IM telok danga onoki Frontier Nagaland asoshi nokdakba mapa nung yariang ta metetdaktsüogo,” ta paisa ashi.
Tan hopta nung ya ENPO telok ka New Delhii orr Union home minister Rajnath Singh ajurutsü tebilemba lir.
“Onoki August 20 nü New Delhi-i aotsü bilemdagi aser yangji onoki Home minister ajurua state balaka akümtsü nüngdakba onüktem agütsütsü.” ENPO kübok aliba Eastern Naga nunger kin trok lir aser parnoki parnok atema state balaka meshir. Taoba mapangtem nung state sorkari Nagaland anüdoklen terenlok mapa inyakba nung temulung magütsüi aküm, iba jagi tanü parnok jashir aser timatemer.
India yimten nüjiso mangu tashibo tang Nagaland anüdoklen ENPO purtem lushi ya India nunga mali asü aser Burma aser China küboka mali asü. Ajisüaka, India yimten nüjiso anguba sülen North East Frontier Agency (NEFA) kübok yutsü aser Nagaland state angudang Nagaland nung tendaktsü.