ENPO telongtet nung ULBs election magidaktsütsü

Dimapur, January 14 (TYO) : January 14, 2017 nü ENPO Tribal Federating Units aser Frontal Units külem rongdak senden ka amen.
CKS Hall Tuensang Hq. nung amenba senden nung, ULBs dak sendakba onüktem benoka olemtep, ta ENPO sangdong ka nung metetdaktsü.
ENPO-i taoba mapang Nagaland nung Urban Local Bodies (ULB) election indang telemtetba agia alibatem senden nung benoka olemtep aser telemtetba kar agi, ta ENPO-isa ashi.
Parliament-i ULBs atema tang yanglua aliba ozüng ajanga asen sobaliba nungi benshia aruba inyakyim aser temzüngtem anema lir, ta senden nung adenertemi bangjemtep.
ENPO-i iba dak sendakba asoshi state sorkar dang nungi kuli tejangja meshi saka magütsü nung senden nung adenertemi ENPO telongtet nung ULBs election magidaktsütsü telemtetba agi.
Iba asoshi ENPO-i federating tribal unit 6 (trok) dang ULBS/Municipal & Town council election nung shilem magitsü mepishia metetdaktsür aser January 17, 2017 tashi nung election nung tokteptsü atema tenüng agüja alir ajaki tenüng meyipa agitsü tetuyuba agütsür, ta ENPO sangdong nung metetdaktsü.
ULBs indang inyakyim ajanga Arrla 371A ajembanga ayur anungji ENPO kübok züngsem kari danga ENPO taginüba anema mapa inyakra, iba tebilemtsüji pei nija khuret asütsü.
ENPO-isa Nagaland state sorkar dang Naga nunger ajak ajungtsü mechi nung aser Nagaland nung civil society tem ajaki haihaura kaa telemtetba ka magi tashi ULBs election magitsü atema mepishia metetdaktsütsü senden nungsa bangzünga renem.
Maneni, ENPO Noklak Resolution onük 4 nung ajemdaker, ENPO-i ENWO dang Joint Action Committee on Women Reservation (JACWR) nungi tenüng agientsü atema mepishitsü telemtetba agi.
ENPO public ajangzüktsü mechi nung ENWO-i JACWR nungi tenüng meyipa agitsü atema mepishitsü lemtet aser iba temepishiba magizükba ajanga timtem kar danga adokra ENPO-i tebilemtsü khuret mabentsü, ta ENPO sangdong nungsa shia lir.