ENSF benjung nung beat contest aka

Dimapur, July 30 (TYO) : Mon local ground nung Eastern Nagaland Student Federation (ENSF) Fiesta amungdang, July 28, 2016 nü ‘The 6 Strings’ omen nung ajemdaker beat contest ka takok ngua agiogo. Iba sentong nung Parliamentary Secretary N&RE, Fire & Emergency Service, Toyang Chang tongti tesemdanger, SP Mon, Yangpa konyak tetushi tejaoker aser tesüiba mapang ENSF Tir, Hawang tenüng teta iba sentong nung adentsü jaoka liasü.
Asen lokti nung telemsa aser teraksa jenti dang lir. Lanurtema yi aser mozü lar aika kümogo. Anungji item teraksa aser telemsa yanglushitsü asoshi tangar nem tai metongloktsüi nisung shiai pei sasa yanglushitsü nüngdak. Anungji lenir ajaki pei nem nungloktsüba mapa tashi ita inyaktsüla. Lenirtemi pei atema dang bilemba yimya intoktsü nüngdak, ta tongti tesemdangeri o jembidang ashi. Pai, music ya ajaki angatetba oshi ka mesüka lir aser ibai ajanga kin trok yongtsü nung tesentaktep tali tashi itdaktsür, ta shisem.
Tetushi tejaokeri, ENSF lenirtemi Eastern Nagaland (EN) atema mapang tenlaba atema pelar, ta ashi. Pai kenten sentong nung shilem agirtem dang pei dak aliba sempet lenmang teindangba nung amshitsü ajungshi.
Tenüng teta jaoksang tesüiba mapang ENSF Tir, Hawang-i, iba senden nung tanga jilatem nungi arua amunger ajaki pei talidaki aodang yimjung osang bener aotsü ajungshi. EN nung kin trok tsüngda nisung shiai yimjung osangbener ka ama litettsüla, ta pai ajungshi.
Hawang-i, lokti nung temelenshi adoktsü atema lenir aser lanurtem tsüngda tesentaktep tashi itshitsü nüngdak aser nisung shiai yimjung aser temeim atema inayktsüla, ta ashi.
Beat contest nung United Sangtam students conference-i mezüng jenjang nung takok angu aser Conference of Chang student’s union-i tanabuba jenjang nung takok angu.