ENSF-i alima lendong agi timtemertem atema teyari meshir

Dimapur, August/Luroi 30 (TYO): Taküm küm Nagaland nung tzümetsüng aser anentsü lendong ya Nagaland anüdoklensa tamajung atalokba agi tang tashi kibong aika kanga timtem nung lir, anungji parnok nemji teyari agütsüdaktsüner ta Eastern Naga Students’ Federation (ENSF)-i state government dang metetdaktsüogo.
“Eastern Nagaland nung timtema alirtemji maneni yaritsüla aser tayimtsü ajanga Kiphire, Tobu aser tanga tesemtem nung jangotsü agüja alibaji maneni agütsütsüla,” ta ENSF general secretary Imtichoba Chang-i metetdaktsü.
Tang tashi nung state government-i yariba asoshi pelar aser ano maneni yaridaktsüner ta metetdaktsüba osang ka nung, tesem aika nung lenmang aser apu raksaba ajanga tang tashi gari tulu mesenzütetter aser kaketshirtema kaketrejui mao joko mapang talangka süir ta ENSF lenirisa ashi.
Parnokisa government dang lenmang aser apu yanglushiba maparen nung ketdangser aser inyakertemi senotsü miimzüka chitsür mapa meinyaki toktsütsüsa meinyaktsüla ta metetdaktsü.
Ano, Meluri nunga Additional Deputy Commissioner Rhosietho Nguori-i ashiba agi, tzümetsüng agi sub division nung asemsü nung anasübo timtem tia nung lir aser Lephori yimtakbo alu lenmang nung apu raksaba agi aluyimertem alui moutet timtem takoksa ajurudagi. Item asoshi teyari nüngdaker ta ADC-isa ashi.