ENSF-i Oct. 23 nungi DoSE anema lungkak aittsü

Dimapur, October 18 (TYO): Eastern Naga Students’ Federation (ENSF)-i October 23, 2017 nungi tenzüka shilem lemsar Department of School Education (DoSE) Directorate nung lungkak aittsü telemtetba agiogo.
Department-i Eastern Naga nunger nem temeden magütsüi September 25, 2017 nü Maths & Science Subjects (GT) tatidang agiba anema parnoki iba telemtetba agi, ta ENSF President, Sepili L. Sangtam aser General Secretary Imtichoba Chang nati sangdong ka nung ashi.
October 18, 2017 nü Kohima nung emergency presidential meeting ka alidang lungkak aittsü lemtet aser temeden mangu tashi agitsü, ta tenatisa shia lir.
State sorkari January 9, 2009 nü sangdong agütsüba nung ajemdaker Department-i GTs (Maths & Science) mapa atema tanaben advertise agüjang ta ENSF-i aiben temepishiba agütsü aser tatemsabubaji parnoki Chief Minister dang pai tiyongtsü aitsü aser anogo 15 nü tsüngda advertise agütsüshitsü temepishiba liasü.
Chief Minister-i iba temepishiba agizük aser bangdak Minister dang aibalen metongshitsü aser sorkar sangdong kübok mapa inyaktsü tetuyuba agütsü. Ajisüaka, parnoki anogo züngzüktsüba süiaka Department-i iba tebilemtsü atema mapa meinyak aser CM-i ashiba manga, ta ENSF mendenpurtemisa metetdaktsü.
“Iba jagi onoki mapa talila inyaktsü lemtet aser lungkak aitba mapang Kohima nung alirtemi onok den amalitepa yariteptsü mepishir. Lungkak aitba mapang langka kar danga atalokra, iba tebilemtsüji sorkar aser School Education Department-i abentsü,” ta ENSF President, Sepili L. Sangtam aser General Secretary Imtichoba Chang natisa metetdaktsü.