Entsü Temesüng : Yob 19:7-2

“Kechiyong munguzünu tepen mepungaka, tsükmenatsü dong tejang meliaka… aji saka ni Kibuba nung pelaseta alitsü, ni kü tekümtet Tsüngrem dak pelatsü.” (Hab. 3:17, 18).
Mangyimba Yobi asüngdanger, “Entsü temesüng nung tesola lidima?” (Yob 6:6). Masü, ibaji tesola masü, saka chiyongtsü tajung! Taküm nung tetendangba jagi asen tamang asadanger. Kodang asenoki Yisu, asen Tetenzük aser Tatembang nungi asen tenük agiendir tebilemtsü adoker (Ibri 12:1). Kodang tzüsem yipru nung asenok arakseter asenoki ayimtener aser Tsüngremi asüngdanger, “Nenok tamang kong lir?” Timtemji asenoki timi agizükra, asen tamang tashi aittsü. Pa teyimla ajak samadang, Yobi takok ngua sangdong, “Ajiang, Pai ni lepsettsü ni teyimla maka, aji saka ni Pa madang kechi tim aji inyaktsü.” (Yob 13:15). Richard Wumbrand (1909-2001) aser pa tebutsü Sabina parnok küm 14 Communist tepuokdak rishikangshia aliba indang rasaa ashi: “Tepuokdak onoki Theology mangazük aser Tsüngrem angazük.”
Timtemi Tsüngremer taochi tali junga angatetdaktsür. Yob nungi Kibubai pa adianu, kinünger, Tembartem, kinüngtsü aser Tanurtem ajak agien. Kodang meimchir teyari ajak agiendir, asenoki Kibuba dak rangloker. Pai asenok nungi atsükaka aser Pa abilen achichi mungaka, asenoki temulung lema ashitsü, “Asenoki memetet, saka Pai metet.” (Yob 23:8-10).
Kodang asenok timtemdir, asenoki tangar timtemba metetter (2 Kor. 1:4). Tsüngi O mapa tanü jangramatemer. Yobi ashir, tsüngi o temulung shia/aria bilemba makai ashibaji, “tagidak makaba” mozü mapa inyakertem lir, “tepetzük tesüneptsür” lir aser “amajok o jembirtem” lir (Yob 13:4; 16:2; 21:34). Tanü asüng tsüngi o computer nungi danga agütsür. Asen nüngdakji zübu aketba taneptsür asenoki nüngdaker. Kibuba Yisui Pa kangki nung angenloka yur asenok zübu anebalur. Pai inyakba ama inyaktsü asenok asoshi kar lir ma?
Tensa tamajungi asenok dak aliba tanela tashi-i mapa meinyaki aliba arakzüdaktsür. Tetsübutsü shiruru ka mangu tashi asenoki karaa masemtetter. Kodang tetsübutsü shiruru ka idangji asenoki kara, kara asema aor. Yamaji tensa tamajung ajanga asenok dak mapa meinyaki aliba tanela tashi arakzüdaktsür.
Timatemba mapangji jungkai adokba tulu adokba mapang lir. Yohani lisem lima nung timtem nung aliba mapang pa dangi jungkai tulu adok. (J. Adok 1:9).