EPFO portal hack asü; Nisung crore 2 shi kongshitsü

New Delhi, Monupii (May) 2 (Agencies): Employees Provident Fund Organisation (EPFO) nung züngsema aliba züngsem crore 2.7 shi ka indang personal aser professional details auyaogo.
Central Provident Fund Commissioner-i Ministry of Electronics and Information Technology dangi züluba shidi ka nung hacker temi EPFO indang Aadhaar seeding portal nungi data auyaogo ta shia lir.
Paisa Ministry of Electronics and Information Technology indang technical team dang aadhaar.epfoservices.com nung metokmeperitem reprangshimtsü atema asüngdang.
Iba portal ya khen atema shibanga lir aser iba portal ajanga EPFO züngsemtem indang Aadhaar number den provident fund account tem sendakteper.
Intelligence Bureau (IB)-i “hacker temi EPFO indang website (aadhaar.epfoservices.com) nungi data auyazüker” ta osang sangoktsü. Iba dak sendakba osang tejangja kecha mangazük saka website nung EPF subscriber tem indang tenüng aser address den parnok mapa inyakba osangtem lir, ta commissioner-isa shidi nung metetdaktsü.
“Nisung shiai parnok indang itasen nungi 12% provident fund ama enoktsür, anungji parnok indang itasen temetettsütem auyar alitsü akok. Nisungtemi PF agizüka agir anungji parnok indang bank account number tema auyar alitsü akok” ta cybersecurity expert Anand Venkatnarayan-i osangbener dang ashi.
Rongchii (April) 2017 aser Aenjeti (January) 2018 tsüngda sorkar indang website 114 tashi hack süogo, ta Metsüremi (March) ita Ministry of Electronics and IT-i Lok Sabha nung metetdakja liasü.
Rongchii (April) 6 nüa defence, home aser law ministry tem dena website aika hack süogo ta osangtem prokshi saka sorkari ibaji hardware timtem ajanga dang liasü ta kuli agütsü.