EPL 2015-16: Manchester United nung Neymar madentsü

Barcelona, August 30 (Agencies) : English Premier League (EPL) nung club tulu Manchester United-i pa alizüktsü jembir ta olulu kar adokbaji tiyazü ta Barcelona asayar Neymar-i metetdaktsü.
Manchester United-i $218 million agi Brazil nunger asayar Neymar alitsü mulunga lir ta osang kar ajanga ashi.
Honibarnü Camp Nou nung Barcelona aser Malaga tsüngda La Liga asaya nung Neymar-i shilem agi aser parnoki goal 1-0 agi takok angu. Pa mapang tatsüka temang manemba agi asaya nung shilem magii aru.
Neymar-i ashiba pai Barcelona nung Argentina nunger Lionel Messi aser Uruguay nunger Luis Suarez na den külemi asayaba atema pelar.
“Ni Manchester indang kecha memetet. Ni Barcelona nung adenba atema pelar aser Barca nungertem marentaki liang ta sangoktsür. Ni iba club toktsür maotsü” ta arishi küm 23 tain Neymar-i ashi.
“England nungi pound million aika aruyonga ni Barcelona nung dang dennür” ta paisa shisem.
Neymar maneni Barcelona nung küm pungu züngsemtsü atema jembitepsü imlar aser iba asoshi $279 million shi agütsüteptsü akok.
Manchester United manager, Luis van Gaal-i par club nung asayar tajung ka anioknür saka Neymar-i ashiba olenji ajanga pa kanga tezü atangtsü akok.