EPL: Hotspur teloki goal 4-1 agi West Ham akok

London, November 23 (Agencies): Forward asayar, Harry Kane-i goal 2 agütsüba densema, par Tottenham Hotspur teloki goal 4-1 agi West Ham United telok madak takok ngua tang tasayadak English Premier League (EPL) asaya yashi Deobar nü asayaogo.
England striker, Kane-i yashi asaya tenzüker minute 23 buba nung goal 1 agütsüba sülen külem asayar, Toby Alderweireld-ia minute 33 buba nung goal 1 agüja par Hotspur telok temaba jenjang nung ajungkettsü.
Tesülen, Kane-i maneni goal 1 agütsüba den külemi, külem asayar Kyle Walker-ia goal 1 agütsüba yong par telok goal 4-0 agi temaba jenjang angu.
Asaya tembangtsü minute 3 anünga alidang Manuel Lanzini-ia goal 1 agüja par West Ham telok jenjang tajungba kümdaktsü.
Ajisüaka, tanüngba goal 3 memeyiptsütetba yong par West Ham teloki yashi tamakok ajuru.
Tan takok anguba ya densema, Hotspur teloki tan agi EPL asaya 12 buba atonga akokba otsü yangluba den külemi, tan EPL asayamong nung shilem agir temaba jenjang nung aliba telok tarensen nung 3 buba aser 4 buba jenjang abener, Manchester City aser Arsenal telok na sülen anidaka, 5 buba jenjang abener telok kümogo.