EPL: Keoman-i Manager of the Month sempet agizük

London, February 05 (Agencies): Southampton manager, Ronald Keoman-i Britain nung ayonga asayaba English Premier League (EPL) asayamong indang Manager of the Month aser Manchester City striker, Sergio Aguero-i EPL Player of the Month sempet agizükogo.
Pa lenisüba kübok par Southampton teloki Watford, West Bromwich Albion aser Manchester United telok madak takok anguba densema, taoba January ita asayaba asaya 4 nung asaya 3 tashi akokba nüngtem nung Keoman nem January ita indang Manager sempet ya agütsü.
“Manager of the Month sempet agizüktsü maongka anguba atema kanga pelar,” ta Manchester City Manager, Manuel Pellegrini; Tottenham Hotspur Manager, Mauricio Pochettino aser West Ham United Manager, Slaven Bilic nunger den temaba jenjang angusang, Koeman-i metetdaktsü.
Koeman-i tan agi Manager of the Month sempet tasembenbuba agizüker lir.
Aguero-ia par City teloki January ita agütsüba goal 8 nung pai goal 5 agüja tan agi Player of the Month sempet tasembenbuba atema agizüka liasü.